Men álem chempıony bolmaı toqtamaımyn - Aıdos Erbosynuly

- Astanadaǵy boks keshine tyńǵylyqty daıyndalǵanyńyzdy jekpe-jekten baıqadyq. Qarsylasyńyz esh qaýqar tanyta alǵan joq...

- Iá, men kez-kelgen jekpe-jekke osylaı joǵary daıyndyqpen kelemin. Daıyndyqsyz is bitpeıdy.

- Aıqasty ádeıi qysqa ýaqyt ishinde bitirgińiz keldi me?

- Osy jekpe-jektiń aldynda azdap jaraqat alyp qalǵan bolatynmyn. Qazaqta: «tún uzarsa, tús kóbeıedi» degen mátel bar emes pe?! Aıqasty soza bersem jaraqatym syr berip, jeńisti ýystan shyǵaryp alam ba dep, osylaı erterek aıaqtaýdy jón sanadym.

- Siz jalpy ár jekpe-jekterińizdi erte aıaqtap kele jatyrsyz. Jankúıerlerińizdiń meıiri qanbaı qalyp júrgen joq pa?

- Árkimniń qalaýy ár basqa. Bireýge qansha rýnd bolsa, sonsha ýaqyt judyryqtasqan unaıdy. Al bireýlerge rıngke shyǵa salyp, qarsylasyn sulatyp salǵan unaıdy. Óz basym jarysty erterek aıaqtaǵandy unatam. Eger, 6,9,12 rýndtyq aıqastardy aqyryna deıin jetkizý kerek bolsa, jankúıerlerińdi jalyqtyryp almaý jaǵyn da oılastyrý kerek.

- Bul sizdiń kásibı rıngtegi jetinshi aıqasyńyz. Jeteýinde de qarsylasyńyzdy aıqyn basymdylyqpen uttyńyz. Endi, tıtýldyq aıqastarǵa shyǵýdy qaı ýaqyttarǵa josparlap júrsiz?

- Onyń aýly da alys emes. Buıyrsa aldaǵy eki jyldyń ishinde álem chempıony atanýǵa bar kúsh-jigerimdi salamyn. Qazir ár saǵatym, ár kúnim belgilengen jospar boıynsha júrip jatyr. Jospardyń basty maqsaty - álem chempıony ataný. Biz soǵan kún sanap jaqyndap kelemiz. Sál ýaqyt kútińizder...

- Qazir qaıda jattyǵyp júrsiz? Qanat Islamnyń komandasymen birgesiz be?

- Joq, men Qanat aǵalardan bólek jattyǵamyn. Biraq Islamdy aǵa retinde qatty syılaımyn. Úırenerim de kóp. Ol naǵyz otanshyl azamat. Osyndaı aǵalarymyz kóp bolsyn. Al men  amerıkalyq «Fight Promotions» kompanııasynyń jetekshiliginde jattyǵyp, jarystarǵa shyǵyp júrmin.

- Bul kompanııada qazaqtardan taǵy kim bar?

- «Fight Promotions» - kásipqoı bokstaǵy tanymal promoýterlik uıymdardyń biri. Búginde bul kompanııa kelisimsharty boıynsha qazaqstandyq Danııar Eleýsinovtiń týǵan aǵasy Dáýren Eleýsinov bar. Sonymen qatar buryn ózim óner kórsetken «Astana Arlans» klýbynda el  namysyn qorǵap ketken ýkraınalyq Sergeı Derevıanchenko da «Fight Promotions» jetekshiligimen sharshy alańǵa shyǵyp júr. Bolashaqta bizden basqa otandastarymyz kelýi ábden múmkin.

- Bıylǵy jyl osy Astanadaǵy jeńisińizben  aıaqtady ma, álde alda taǵy da basqa jekpe-jekke shyǵasyz ba?

- Jeltoqsan aıynda taǵy bir kezdesý ótkizý josparda bar. Ony promoýterlerim sheshedi.

- Jalpy sportqa qashan keldińiz, aıta ketseńiz...

- Men Almaty oblysy Jarkent aýdanynda dúnıege keldim. Biraq 10 jasymda Almaty qalasyna kóship keldik. Bul kósh meni sportpen, sonyń ishinde bokspen aınalysýǵa múmkindik týdyrdy. Bylǵary qolǵapty 11 jasymnan bastap kıdim.

- Áńgimeńizge rahmet!