Memtapsyrysty durys oryndamaǵan kvazımemlekettik kompanııa basshylary jaýapqa tartylady

ASTANA. KAZINFORM – Jýyqta ǵana Prezıdent qol qoıǵan Bıýdjet kodeksine Joǵary aýdıtorlyq palatanyń usynymy boıynsha aqparat salasyndaǵy kvazımemlekettik kompanııa basshylarynyń jaýapkershiligin arttyratyn norma engizilmek.

- Qazaqstanda aqparat salasyndaǵy kvazımemlekettik sektor sýbektileri basshylarynyń memlekettik tapsyrmany oryndaý sharttarynda belgilengen tikeleı jáne túpkilikti nátıjege qol jetkizbegeni úshin jaýaptylyǵy engizildi. Bul shara Joǵary aýdıtorlyq palatanyń usynymy boıynsha qabyldandy, - dep jazady palatanyń baspasóz qyzmeti.

Mundaı usynymǵa memlekettiń aqparat saıasatyna júrgizilgen aýdıt negiz bolǵan kórinedi.

- Memlekettik aqparattyq saıasatqa júrgizilgen aýdıt barysynda Bıýdjet kodeksinde tıisti kvazımemlekettik kompanııalar basshylarynyń memlekettik tapsyrmalardy oryndaý sharttarynda belgilengen tikeleı jáne túpkilikti nátıjege qol jetkizbegeni úshin jaýaptylyǵyn kózdeıtin normalar joq ekeni anyqtaldy.

Memlekettik tapsyrmanyń kómegimen azamattar memlekettik organdardyń qyzmetinen, mańyzdy respýblıkalyq jobalar men baǵdarlamalardan habardar bolady. Osyǵan baılanysty Joǵary aýdıtorlyq palata Úkimetke zańnamaǵa qajetti ózgerister engizý múmkindigin qaraýdy usyndy. Nátıjesinde Memleket basshysy 15 naýryzda qol qoıǵan jańa Bıýdjet kodeksinde kvazımemlekettik sektor sýbektileri basshylarynyń jaýaptylyǵyn bekitetin norma kózdeldi, - delingen resmı málimette.

Eske salsaq, Joǵary aýdıtorlyq palatanyń nusqamasy boıynsha jylýmen, sýmen jabdyqtaý jáne sý burý júıeleriniń qurylysyn jańǵyrtý kezindegi bıýdjet qarajatyn utymsyz jumsaý toqtatylǵan edi.