Memstandart bekitilmeıinshe dekoratıvti ósimdikterdi ósire almaımyz — ekolog

ORAL. KAZINFORM — Qalalar men aýyldarda jyl saıyn kóptegen aǵash egilgenimen keıin solardyń qýrap, óspeı qalatynyn kórýge bolady. Munyń syry nede? Osy másele jóninde «Batys Qazaqstan ekologııalyq geografııalyq qoǵamy» qoǵamdyq birlestiginiń tóraǵasy Darhan Sarıev pikir bildirdi. 

Ekologtyń aıtýynsha, elimizde memlekettik standart bekitilmeıinshe, dekoratıvtik ósimdikterdi ósirýde nátıjege jetý qıyn. 

Darhan Súndetqalıulynyń sózine qaraǵanda, standart talaptaryn eskermeı, memleket qarjysyn kógaldandyrýǵa jumsaý qyp-qyzyl shyǵyn. 

— Eń áýeli otyrǵyzylatyn aǵashtyń sapasyn tekserip alý kerek. Bekitilgen standarttyń joqtyǵy dekoratıvtik ósimdikterdiń sapasyna saraptama jasaýǵa múmkindik bermeıdi. Máseleniń mańyzdy bir ushy osynda, — deıdi D. Sarıev.

Onyń aıtýynsha, sapasyz aǵashtardyń egiletinine mysaldy kóptep keltirýge bolady. Mysaly, Petropavl qalasynan ekolog Artýr Rıazapov joldaǵan beınejazbada kóshettiń sapasyz ekeni kórinip tur.

Sol sebepti aǵashtar qısyq bolyp ósedi nemese qýrap qalady. Qarajat ta bosqa shyǵyndalady. Bul Qazaqstannyń barlyq qalalaryna ortaq jaıt deýge bolady. 

— Kógaldandyrý boıynsha memlekettik standartty resmı túrde bekitip, ony mindetti túrde qoldanǵan kezde mundaı berekesizdikke jol bermeýge bolady. Jol boıynda qyp-qysqa nemese butaqtary joq sopıyp turǵan, sondaı-aq qısyq aǵashtardy jıi kóremiz. Qatty jel soqqan ýaqytta mundaı tal-terekter tamyrymen julynyp qalady. Kútim bolǵannyń ózinde ǵumyry uzaqqa barmaýy múmkin. Mine, biz osy máseleni barynsha túsindirip, memlekettik standart kerektigin aıtyp kelemiz. Keńestik dáýir kezinde qoldanylǵan standarttardy da negizge alýǵa bolady, — deıdi ekolog. 

Onyń paıymdaýynsha, eger memlekettik standart bolsa, qala men aýdandardyń turǵyn úı-kommýnaldyq sharýashylyq bólimderi tapsyrys bergende, kóshetterdiń sapasy men jaı-kúıine nazar aýdaryp, tekserip alar edi.

Memlekettik standart jeke kógaldandyrýmen aınalysatyndar úshin de kerek. Aıtalyq, baý-baqsha ortalyǵy sheteldik tálimbaqtan kóshetterdi satyp aldy delik.

Kelisimshartta taýar qabyldaǵan kezde sapasyz bolyp shyqsa, ony sarapshy uıymǵa berip, kemshilikterin kórsetip, qorytyndy jasalatyny jazylady. 

— Qysqasy, memlekettik standart bolmasa, saraptama da jasalynbaıdy. Sondyqtan múddeli organdar ókilderin qatystyra otyryp, Astanada bul máseleni túbegeıli talqylap, naqty sheshimge kelgen jón, — dep túıindedi sózin D. Sarıev.

Eske sala keteıik, budan buryn Batys Qazaqstanda egilgen mıllıondaǵan aǵash nege jersinbeı qýrap ketetinin jazǵan edik.

Sondaı-aq ekolog ár qalada kólemi 30 gektar bir park salynsa, artyq bolmaıtyny jóninde pikir bildirdi.