Memshekarada elektrondyq kezekke qatysty jańa erejeler kúshine endi

ASTANA. KAZINFORM — 2025 jylǵy 17 qyrkúıekte Qarjy mınıstri avtomobıl kóligimen Memlekettik shekarasyn kesip ótý, sondaı-aq júk pen taýarlardy tasymaldaý erejelerine ózgerister engizý týraly buıryqqa qol qoıdy. 

Jańa ózgeristerge sáıkes, jergilikti atqarýshy organdar endi shekaralyq ótkizý pýnktteriniń janynan kútý aımaqtaryn uıymdastyrýy tıis.
Sonymen qatar shekaradan ótkizý tártibi naqty aıqyndalyp, qandaı jaǵdaılarda kezekten tys, al qandaı jaǵdaılarda jedeldetilgen tártippen ótkiziletini naqty bólinip kórsetilgen.

Elektrondyq kezek júıesinde belgili bir sanattaǵy kólik quraldaryna, júktiń jáne taýarlardyń túrlerine qatysty kezekten tys tirkeý múmkindigi kózdelgen.
Qujatta atap ótilgendeı, EKJ-da kezekten tys tártippen tirkeý mynadaı sanattar boıynsha kólik quraldaryna, júkke jáne taýarlarǵa qatysty júzege asyrylady:

poshta operatory — brondaýdyń boljamdy kúnine deıin kúntizbelik 10 kúnnen keshiktirmeı kólik quraldarynyń tizimin Memlekettik kirister organdaryna aldyn ala joldaǵan jaǵdaıda;

janýarlar, tez búlinetin, qaýipti júkter, sondaı-aq Qazaqstan eksporttyq júkteri — Eýrazııalyq ekonomıkalyq komıssııanyń sheshimderimen bekitilgen nysandar boıynsha rásimdelgen taýarlarǵa arnalǵan deklaratsııa nemese tranzıttik deklaratsııa, sondaı-aq EAEO pen QR keden zańnamasyna sáıkes tranzıttik deklaratsııa retinde paıdalanylatyn qujattar bolǵan jaǵdaıda jáne tek kórsetilgen júkter tasymaldanǵan jaǵdaıda;

gýmanıtarlyq, áskerı júkter, sondaı-aq shet memlekettiń úkimetinen dıplomatııalyq arna arqyly resmı ótinish boıynsha — memlekettik organdar kólik quraldarynyń tizimin brondaýdyń boljamdy kúnine deıin kúntizbelik 10 kúnnen keshiktirmeı MKO-ǵa aldyn ala joldaǵan jaǵdaıda.

Sonymen qatar shekarany kezekten tys kesip ótýge bir jumys kúni ishinde brondaýǵa ruqsat etiletin sany táýliktik ótkizý qabiletiniń mynadaı shekterinde bolýy tıis:

Poshta operatoryna — bir paıyzdan aspaýy kerek;

janýarlar, tez búlinetin, qaýipti júkter, sondaı-aq Qazaqstan eksporttyq júkterdi jáne gýmanıtarlyq, áskerı júkterdi tasymaldaý kezinde — bes paıyzdan aspaýy kerek.

Bron rásimdelgen kúni kórsetilgen negizder boıynsha kezekte bos oryndar jalpy tártippen brondaý úshin qoljetimdi bolady.

EKJ-y arqyly ótkizý pýnktine kólik quraldarynyń jedeldetilgen tártippen tirkelýi memlekettik shekarany jedeldetilgen tártippen kesip ótý qyzmetine aqy tólegen jeke jáne zańdy tulǵalarǵa qoldanýǵa múmkindik berilgen.

Tólem mólsheri avtokólikterdiń, júk pen taýarlardyń ótkizilýi jáne olardyń elektrondyq kezek arqyly ótýi boıynsha tarıfterdi retteıtin buıryqpen aıqyndalady.

Sonymen qatar Memlekettik shekarany jedeldetilgen tártippen kesip ótýge arnalǵan brondaý sany bir jumys kúni ishinde elektrondyq kezek júıesinde tirkeletin ótkizý pýnktiniń naqty táýliktik ótkizý qabiletiniń 1 paıyzynan aspaýy tıis.
Eger paıdalanýshy elektrondyq kezek júıesine jalǵan nemese durys emes málimetter engizse, tekserý nátıjesi boıynsha tirkeýshi onyń jeke kabınetin buǵattaıdy.

Tirkeýshi qyzmetkerleriniń sheshimderine, áreketterine nemese áreketsizdigine qatysty shaǵymdy onyń basshysynyń atyna berýge bolady. Mundaı shaǵymdy tirkelgen sátten bastap bes jumys kúni ishinde qarastyrý mindetti.

Eger QR zańnamasynda ózgeshe kózdelmese, sotqa júginý tek Ákimshilik rásimdik-protsestik kodeksiniń 91-babynyń 5-tarmaǵynda kórsetilgendeı, sotqa deıingi shaǵymdaný tártibi ótkennen keıin ǵana múmkin bolady.

Sonymen qatar ótkizý pýnkti arqyly kirý jáne shyǵý, sondaı-aq memlekettik shekarany avtokóliktermen kesip ótý memlekettik tirkeý nómirlerin tanıtyn kameralar arqyly júzege asyrylady.Atalǵan kameralar kólik quraldarynyń ótýin tirkeıdi, nómirlik belgilerdi tanıdy jáne odan ári óńdeý jumystaryn júrgizedi.

Memshekarany kesip ótken avtomobıl kólik quraldarynyń tirkeý nómirlerin úzdiksiz oqý, saqtaý, tirkeý nómirleriniń derekter bazasyn júrgizý, qorǵalǵan ınternet baılanysy/baılanys arnasy arqyly EKJ-men ıntegratsııalanǵan kólik quraldaryn memlekettik tirkeý biryńǵaı aqparattyq júıesi arqyly júzege asyrylady.

- EKJ-y arqyly avtomobıl kólikteriniń, júk pen taýarlardyń ótkizilýi avtomatty bóget nemese basqa kedergiler qurylǵylaryn paıdalaný arqyly júzege asady. Olar EKJ-niń MKO-men nemese MKO pýltimen ıntegratsııasy arqyly iske qosylady. Avtokóliktiń memlekettik tirkeý nómiri jáne elektrondyq kezekke brondaý kezinde paıdalanýshy engizgen derekter sáıkes kelgen jaǵdaıda, — dep kórsetilgen qujatta.

EKJ-da tirkeý eki jolmen júzege asyrylýy múmkin: tirkeýshiniń saıtynda elektrondyq tsıfrlyq qoltańbany (ETsQ) paıdalaný arqyly nemese SMS ne messendjerler arqyly jiberiletin kodpen rastaý arqyly.

EKJ-y avtomatty túrde tekseredi:

saqtanýshyny, saqtandyrylýshyny (júrgizýshini), paıda alýshyny kórsete otyryp, kólik quraldary ıeleriniń azamattyq-quqyqtyq jaýapkershiligin saqtandyrý shartynyń (sharttarynyń), osyndaı sharttyń qoldanylý merziminiń, kólik quralynyń (shassıdiń) sáıkestendirý nómiriniń (VIN) jáne EKJ-nyń biryńǵaı saqtandyrý derekter bazasymen aqparattyq ózara is-qımyly arqyly memshekarada memlekettik baqylaýdy júzege asyrý úshin qajetti basqa da derekterdiń bolýy;

paıdalanýshynyń memshekara arqyly avtomobıl kólik quraldaryn ótkizý boıynsha EKJ-da brondy paıdalanǵany úshin esepke alý jazbasyna (derbes shotyna) kepildik qamtamasyz etý (jarna) somasyn buǵattaý;

avtomobıl kólik quraldarynyń memshekara arqyly kesip ótkeni týraly málimetterdiń bolýy EKJ-niń memlekettik aqparattyq júıelermen aqparattyq ózara is-qımyly arqyly qamtamasyz etiledi.

EKJ-ge engizilgen aqparatty:

osy qaǵıdalardyń 18-tarmaǵynyń 1), 4), 5), 8), 10), 14), 15), 16), 17), 17-1), 17-2) jáne 18) tarmaqshasynda kórsetilgen derekterdi avtomatty túrde salystyrýdy QR beırezıdentterge qatysty júzege asyrady;

osy qaǵıdalardyń 18-tarmaǵynyń 1), 2), 3), 4), 5), 6), 7), 8), 9), 11), 12), 13), 14), 15), 16), 17-1), 17-2) jáne 18) tarmaqshasynda kórsetilgen derekterdi avtomatty túrde salystyrýdy QR rezıdentterge qatysty júzege asyrady.

Sonymen qatar EKJ atalǵan qaǵıdalardyń 18-tarmaǵynyń 10) jáne 17) tarmaqshasynda kórsetilgen derekter boıynsha Qazaqstannyń rezıdentterine jol júrisi qaýipsizdigin qamtamasyz etý salasynda aıyppuldyń jáne/nemese aqyly avtomobıl joldary boıynsha jol júrgeni úshin bereshektiń bolýy týraly habarlama jiberiledi.

Erejelerge sáıkes, EKJ-de kóliktiń kórshiles elge shyǵý úshin ótkizý pýnktine kirý kúnin jáne ýaqytyn brondaý tek sol kólik úshin osy nemese basqa ótkizý pýnktterinde jaramdy bron bolmaǵan jaǵdaıda ǵana múmkin bolady.
Paıdalanýshy avtokólik, júk jáne taýarlardy memlekettik shekara arqyly ótkizý úshin tólemdi jáne kepildik somasyn tirkeýshiniń esepshotyna bank arqyly aýdarý arqyly júzege asyrady.

— Sonymen qatar engizilgen túzetýler kóp márte brondaýǵa shekteýler qoıady jáne brondaý ýaqytyn aýystyrý múmkindikterin keńeıtedi, bul protsess ashyqtyǵy men basqarylýyn qamtamasyz etedi, — delingen qujatta.

Eger qyzmet kórsetý qoldanýshynyń kinásinen oryndalmasa mysaly, ol kútý aımaǵynda kedergini paıdalanýǵa brondaǵan kúni men ýaqytynda qyzmetten bas tartsa, SEO-da brondy toqtatsa nemese kólik quraly kútý aımaǵynan ýaqytynda shyqpasa nemese bekitilgen ýaqytta ótkizý pýnktine kelmese, onda qyzmet kórsetilgen bolyp sanalady jáne tolyq tólenýi tıis. Qoldanýshy tólegen qarajat qaıtarylmaıdy.

Sondaı-aq memlekettik shekara arqyly kólik quraldarynyń ótkizý pýnkti úshin SEO-da brondy paıdalaný boıynsha kepildik qamtamasyz etý paıdalanýshynyń shotynda (kelesi brondaýda qaıta qoldaný nemese qaıtarý úshin) tek brondy faktili paıdalaný jaǵdaıynda (kólik quraly ótkizý pýnktinen ótken kezde), sonyń ishinde SEO-nyń memlekettik aqparattyq júıelermen ıntegratsııalyq ózara árekettesýi arqyly rastalǵan kezde ǵana ashylady.

Sonymen birge kepildik jarna tolyq ashylýy múmkin, eger 90 kúntizbelik kún ishinde kólik quraly taǵaıyndalǵan kún men ýaqytta ótkizý pýnktine bir ret kelmegen bolsa nemese osy merzim ishinde bir ret bron toqtatylǵan bolsa.
SEO júıesinde buryn brondalǵan kezekti memlekettik shekarany kesip ótý kúnin jáne ýaqytyn qaıta tólemsiz bir ret aýystyrý múmkindigi qarastyrylǵan.

Alaıda, brondy basqa bronnyń toqtatylýy, aýystyrylýy nemese joıylýynan bosalǵan kún men ýaqytqa aýystyrýǵa (ekinshi ret brondaý) ruqsat berilmeıdi.
Kólik quraldarynyń ótkizý pýnktine kirýi elektrondyq kezek júıesi qalyptastyrǵan tártippen ǵana júzege asyrylady jáne ol kútý aımaǵynan (eger ol qarastyrylǵan bolsa) múmkin bolady.

Bul buıryq  2025 jylǵy 23 qyrkúıekten bastap kúshine enedi.

Buǵan deıin Qazaqstan men Qyrǵyzstan shekarasyndaǵy eki ótkizý beketine halyqaralyq mártebesi berilgenin jazǵanbyz.

Sonymen qatar Reseımen shekaradaǵy pavlodarlyq ótkizý beketterin jańartý jumystary bastalǵanyn jazǵanbyz.