Memsatyp alýlarda 4 mlrd teńgeniń qarjylyq buzýshylyqtary anyqtaldy - Jamaýbaev

NUR-SULTAN. QazAqparat – Memlekettik satyp alýlarda 4 mlrd teńgeniń qarjylyq buzýshylyqtary anyqtaldy. Bul týraly búgin Úkimet otyrysynda QR Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«Osy jyldyń 2 aıynda 2,4 trln teńgeden astam somaǵa shamamen 149 myń memlekettik satyp alý rásimi kameraldyq baqylaýmen qamtyldy. Tekserý qorytyndylary boıynsha 7 437 rásim buzýshylyqtar anyqtaldy. Onyń ishinde memlekettik aýdıt obektileri buzýshylyqtardy joıý týraly habarlamalardyń 90 paıyzdan astamyn oryndady. 328 aýdıtorlyq is-shara ótkizildi», - dedi ol.

Mınıstrdiń dereginshe, aýdıtpen 1 trln 226 mlrd teńge bıýdjet qarajaty qamtyldy. Somasy 4 mlrd teńgege qarjylyq buzýshylyqtar anyqtaldy.

«Taýarlardy jetkizý, qyzmetterdi kórsetý men jumystardy oryndaý, bıýdjetke óteý jáne esepke alý jolymen 2 mlrd teńgege buzýshylyqtar joıyldy. Aýdıt obektileri qyzmetiniń tıimdiligin jetildirý jáne arttyrý úshin 226 usynym berildi», - dedi Erulan Jamaýbaev.