Memorgandarǵa mereıtoılyq sharalardy ótkizgende ysyrapshyldyqqa jol bermeý tapsyryldy
Otyrysqa qatysýshylar Qordaı aýdanynda qaza bolǵandardyń otbasylaryna kóńil aıtty, qalyptasqan jaǵdaıdyń tezirek turaqtanýyna tilektestik bildirdi
Otyrysty ashqan Memlekettik hatshy Abaıdyń 175 jyldyǵy men Ál-Farabıdiń 1150 jyldyǵyn merekeleýdiń bastapqy saltanatty rásimderi Nur-Sultan jáne Almaty qalalarynda ótkizilgenin atap ótti.
Ol sondaı-aq, uly oıshyldar Abaı men Ál-Farabıdiń ulaǵatty muralaryn zerdeleı kele, olardyń izgi ıdeıalarynyń túpki negizi eldiń birligi men yntymaǵymen úndesetinin taǵy da dáleldep otyrǵanyn atap ótti. Abaı óziniń «tolyq adam» tujyrymyn mura etse, Ál-Farabı «baqytqa jetý jolynda bir-birine qol ushyn beretin qoǵam – qaıyrymdy qoǵam» degen ósıetin qaldyrdy. Abaı men Ál-Farabı qaldyrǵan ádilettilik pen qaıyrymdylyqtyń ónegelik murattary Memleket basshysynyń «Halyq únine qulaq asatyn memleket» atty osy zamanǵy tujyrymdamasymen úılesedi.
Komıssııa otyrysynda Memleket basshysy Q.Toqaevtyń halyqqa Joldaýy men «Abaı jáne HHІ ǵasyrdaǵy Qazaqstan» atty maqalasynda jańa mindetterdiń, onyń ishinde mereıtoılyq is-sharalardyń baǵdarlary naqty belgilengenine erekshe nazar aýdaryldy. Atalǵan tapsyrmalar aıasynda memlekettik komıssııalardyń músheleri men memlekettik organdar Abaı men Ál-Farabıdiń rýhanı muralaryn nasıhattaý barysynda zııaly qaýym ókilderiniń jáne basqa da otandastarymyzdyń buqaralyq aqparat quraldarynda keńinen jarııalanǵan pikirleri men usynystaryn eskerýi tıis.
Otyrysta Mádenıet jáne sport mınıstri A.Raıymqulovanyń, Bilim jáne ǵylym mınıstri A.Aımaǵambetovtiń, Aqparat jáne qoǵamdyq kelisim mınıstri D.Abaevtyń, Syrtqy ister mınıstri M.Tileýberdiniń, L.Gýmılev atyndaǵy EUÝ rektory E.Sydyqovtyń, Ál-Farabı atyndaǵy QazUÝ rektory Ǵ.Mutanovtyń esepteri tyńdaldy.
Jıyn sońynda ortalyq jáne jergilikti atqarýshy organdarǵa mereıtoılyq is-sharalardy ótkizý kezinde ysyrapshyldyqqa jol bermeý, olardy joǵary ıdeıalyq jáne naqty qundylyqtarmen qamtamasyz etý jóninde tapsyrma berildi.
