Memorgandarǵa laýazymdy tulǵalarǵa qatysty aıyptaý úkimderine monıtorıng júrgizý mindetteldi

NUR-SULTAN. QazAqparat – Memlekettik organdarǵa laýazymdy tulǵalarǵa qatysty aıyptaý úkimderine monıtorıng júrgizý mindetteldi. Bul týraly QR Memlekettik qyzmet isteri agenttigi Memlekettik qyzmet salasyndaǵy baqylaý departamentiniń dırektory Erlan Saparov aıtty, dep habarlaıdy QazAqparat tilshisi.

Onyń atap ótýinshe, qazirgi tańda Prezıdent Ákimshiliginiń tapsyrmasy boıynsha Memlekettik qyzmet isteri agenttigi Joǵarǵy Sot, Bas prokýratýra jáne Sybaılas jemqorlyqqa qarsy is-qımyl agenttigimen birlesip tıisti is-qımyl algorıtmin ázirledi.

«Atalǵan algorıtmge sáıkes, memlekettik organdar, uıymdar jáne kvazımemlekettik sektor sýbektileri tıisti laýazymdy tulǵalarǵa qatysty toqtatylǵan qylmystyq isterdiń zańdy kúshine engen aıyptaý úkimderine monıtorıng júrgizýge mindetti», - dedi Erlan Saparov.

Agenttik málimetinshe, búginde memlekettik organdar ózara is-qımyldyń osy tártibine sáıkes jumys istep jatyr. Al bul másele boıynsha jumysty úılestirý Memlekettik qyzmet isteri agenttigine júktelgen.

Aıta keteıik, QR Prezıdenti Qasym-Jomart Toqaev «Igilik barshaǵa! Sabaqtastyq. Ádildik. Órleý» atty saılaýaldy baǵdarlamasynda sybaılas jemqorlyqty joıý boıynsha jańa tásilderdi atap ótken bolatyn. Onyń ishinde Memleket basshysy baǵynyshty qyzmetkerler jasaǵan sybaılas jemqorlyq qylmystar úshin saıası memlekettik qyzmetshilerdiń jeke jaýapkershiligin zańdy túrde bekitýdi tapsyrǵan edi. Prezıdent tapsyrmalary negizinde «Qazaqstan Respýblıkasynyń memlekettik qyzmeti týraly» jáne «Sybaılas jemqorlyqqa qarsy is-qımyl týraly» Zańdarǵa tıisti ózgerister engizildi.