Memorgandardyń saıttaryn aqparatpen toltyrý jaǵy aqsap tur
ASTANA. QazAqparat - Búgin Qazaqstannyń jemqorlyqqa qarsy strategııasy aıasyndaǵy sharalardy atqarýdy baqylaý jónindegi arnaıy toptyń otyrysynda memlekettik organdardyń osy saladaǵy jumysy qaraldy, dep habarlaıdy QazAqparat tilshisi.
Baqylaý tobynyń múshesi Vıktor Býsstyń aıtýynsha, 2015-2025 jyldarǵa arnalǵan Qazaqstannyń jemqorlyqqa qarsy strategııasy qabyldanǵanda memlekettik organdar úshin arnaıy is-sharalar josparyn qurý mindeti qoıyldy. Negizgi maqsat - sybaılas jemqorlyqty azaıtý. Osylaısha,úsh jyldyq jospar bekitildi. Onda barlyǵy 64 shara qarastyrylǵan. Ótken jyldyń josparynda 41 shara boldy. «Resmı aqparatqa sáıkes, ol sharalardyń tek 2-eýi ǵana oryndalǵan joq. Biz barlyq esepterdi zerdelep shyqtyq. Sonyń negizinde memlekettik organdardyń tıisti jumysty qolǵa alǵanyn rastaı alamyz. Degenmen, keıbir memlekettik organdar ashyq resýrstar arqyly óz jumysyn tolyqqandy kórsetpeıdi, ıaǵnı halyqqa tolyqqandy aqparat berilmeıdi. Máselen, memlekettik organdardyń resmı saıttaryndaǵy bólimderdi aqparatpen toltyrý boıynsha naqty mindet bar. Alaıda ol mindetti oryndaý jaǵy aqsap tur. Osy ýaqytqa deıin jiberilgen eskertýlerge qaramastan, resmı aqparatty jańartý jaǵy syn kótermeıdi», - deıdi Býss.
Budan bólek, memlekettik organdar óz saıttaryn aǵylshyn tilinde júrgizýge asyqpaıdy. Sonyń saldarynan sheteldik sarapshylar olardyń jumysyna baǵa bere almaı otyrady. «Memlekettik organdardyń barlyǵynda derlik jemorlyqqa qarsy qosymshalar aǵylshyn tiline aýdarylmaǵan. Buny ózi olardyń tıisti jumysqa atústi qaraıtynyn kórsetse kerek. Negizi, halyqaralyq sarapshylar resmı málimettermen birge saıttardan qajetti aqparatty alyp otyrady. Demek, qazir olar ondaı aqparatty ala almaı otyr. Sodan memlekettik organdardyń ımıdji tómendeıdi. Sondyqtan osy saladaǵy jumysty kúsheıtý kerek», -dep atap kórsetti Býss.
Aıta keteıik, búgin Qazaqstannyń sybaılas jemqorlyqqa qarsy strategııasynyń oryndalýyn baqylaý jónindegi arnaıy jumys toby alǵash ret jańartylǵan quramda bas qosty. Oǵan depýtattar, qoǵam belsendileri, jýrnalıster men blogerler endi. Otyrystyń basynda saıasattanýshy Nurlan Erimbetov pen bloger Ǵalym Baıtuq sózgekelip qaldy.
