Memorgandardyń aqparattyq júıelerin resmı resýrs dep taný kerek – Qasym-Jomart Toqaev

NUR-SULTAN. QazAqparat –Memleket basshysy Qasym-Jomart Toqaev Parlament Májilisiniń otyrysynda memorgandardaǵy bıýrokratııany joıýdyń joldaryn usyndy, dep habarlaıdy QazAqparat tilshisi.

«Taǵy bir másele – bıýrokratııanyń etek jaıýy. Ol azamattardyń sanasynda memlekettik apparat týraly baıaý jumys isteıtin nemquraıly mashına degen ádil túsinik qalyptastyrady.

Bıýrokratııa – reformalardyń sapasyz oryndalýynyń negizgi sebepteriniń biri. Mundaı aýrýdan bárimizge emdelý kerek. Reformanyń formasy emes, mazmuny basymdyqqa aınalýy kerek. Esep úshin esep berý, baqylaý úshin baqylaý júrgizý tásilderi ótkenniń enshisinde qalýǵa tıis. Úderisten aqyrǵy nátıje mańyzdy. Ózin-ózi aqtamaıtyndaı deńgeıde kúrdelindirilgen jáne úderisti shynymen baıaýlatatyn sheshimderdiń bári joıylýy kerek», - dedi Prezıdent.

Onyń paıymynsha, qazir memorgandar tapsyrmalardy iske asyrýda bıýrokratııalyq jaǵyna kóp mán beredi.

«Formasy boıynsha úlgili, biraq mazmuny boıynsha qatty suryptalǵan qujattar ázirlenip jatyr. Negizgi ıntegratsııalyq júıelerdiń bar bolǵanyna qaramastan, memorgandar makýlatýrany qaptatyp, mánsiz hat almasýyn qoıar emes. Memlekettik organdardyń atalmysh aqparattyq júıelerin qaǵazben dáleldeýdi qajet etpeıtin resmı resýrs dep taný kerek. Olaı bolmasa, tsıfrlandyrýdy ne úshin engizip jatyrmyz?

Tsıfrlandyrý sándi oıynshyq emes qoı. Ol memlekettik apparat fýnktsııasyna qoldaý turǵysynan paıdaly bolýy qajet», - dedi Memleket basshysy.