Memorgandardyń aqparatty negizsiz bermeýi memlekettik qyzmettiń bedelin túsiretin áreket retinde baǵalanady
ASTANA. QazAqparat - Memlekettik organdardyń aqparat berýden negizsiz bas tartýy memlekettik qyzmettiń bedelin túsiretin teris qylyq retinde baǵalanady. Bul týraly búgin Ortalyq kommýnıkatsııalar qyzmetindegi baspasóz máslıhatynda QR Memlekettik qyzmet isteri vıtse-mınıstr Aıgúl Shaıymova málim etti.
Onyń aıtýyna qaraǵanda, jaqynda qurylǵan Memlekettik qyzmet isteri mınıstrligi Memleket basshysynyń tapsyrmasyna sáıkes, jańa etıkalyq erejelerdi engizý boıynsha birqatar sharalardy qabyldady.
Onyń ishinde memlekettik qyzmetkerlerdiń qyzmettik etıka normalaryn múltiksiz oryndaý mindettelip otyr. Qyzmettik etıkany, sybaılas jemqorlyqqa qarsy tártipti saqtaý boıynsha talaptar zań aıasynda qamtylǵan.
«Shyn máninde sheneýniktiń etıkalyq norma boıynsha qarapaıym zań buzýshylyǵynyń ózi jalpy memlekettik apparattyń bedeline nuqsan keltiredi. Sondyqtan da biz memlekettik qyzmetke senimdi azaıtatyn teris áreketterdiń jańa túrin engizdik. Búginde oǵan sheshimdi daıarlaý jáne qabyldaý kezinde jeke jáne zańdy tulǵalarǵa zańsyz artyqshylyq berý, aqparat berýden negizsiz bas tartý, sondaı-aq qoldanystaǵy zańnamada qarastyrylmaǵan qujattardy negizsiz talap etý sekildi is-qımyldar engizildi», -dedi vıtse-mınıstr.
Onyń sózine qaraǵanda, osyndaı quqyq buzýshyly6qtar tártiptik sharalardy qoldanýdan bastap, memlekettik qyzmetkerdi jumysynan bosatý jáne memlekettik qyzmetke qaıta ornalasýǵa tyıym salýǵa deıingi sharalardy qabyldaýǵa alyp keledi.
