Memorgandardyń 310 saıty jyl sońyna deıin biryńǵaı platformaǵa biriktiriledi

NUR-SULTAN. QazAqparat – Memlekettik organdardyń 310 saıty 2020 jyldyń sońyna deıin biryńǵaı platformaǵa biriktiriledi. Bul týraly QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń keńeıtilgen alqa májilisinde vedomstvo basshysy Asqar Jumaǵalıev málim etti, dep habarlaıdy QazAqparat tilshisi.

«Búgingi kúni mobıldi úkimet ár azamattyń qaltasyna smartfon retinde «syıyp ketken». Bul neni bildiredi? eGov mobile mobıldi qosymshasynda barlyq qajetti qujat, atap aıtqanda, jeke kýálik, týý týraly kýálik, neke týraly kýálik – bári júktelgen. «Jańa tehnologııalar týraly» zańnyń shyǵýymen atalǵan qujattardyń mártebesi qaǵaz júzindegi túpnusqa qujattarmen teńesedi», - dedi Asqar Jumaǵalıev.

Sonymen qatar, mınıstrdiń aıtýynsha Іshki ister mınıstrligimen birge júrgizýshi kýáligin atalǵan qosymshaǵa qosý máselesi pysyqtalyp jatyr.

«Bir kóligi bar otbasyndaǵy eki adam úshin bul óte yńǵaıly bolmaq. Tehnıkalyq qujattardy berip otyrýdyń qajettigi artta qalady. Memlekettik organdardyń ınternet-resýrstarynyń biryńǵaı platformasy memorgandar men ákimdikterdiń shashyrap jatqan saıttaryn GGOV.kz biryńǵaı saıtyna biriktirýge múmkindik beredi», - dedi mınıstr.

Asqar Jumaǵalıev memlekettik organdardyń 310 saıty jyl sońyna deıin biryńǵaı platformaǵa biriktiriletinin málimdedi. Joba 2 mlrd teńgelik bıýdjet qarajatynyń únemdelýine jol ashyp, saıttardyń 100 paıyz qoljetimdi bolýyn qamtamasyz etedi.