Memorgandardyń úzdik jasandy ıntellekt jobalaryna arnalǵan ulttyq syılyq jarııalandy
ASTANA.KAZINFORM - Qazaqstan Respýblıkasy Jasandy ıntellekt jáne tsıfrlyq damý mınıstrligi QR Memlekettik qyzmet isteri agenttigimen birlesip, memlekettik jáne kvazımemlekettik sektorda, sondaı-aq jergilikti atqarýshy organdar qyzmetinde jasandy ıntellektini qoldaný tájirıbesin damytýǵa jáne ony júıeli túrde engizýge baǵyttalǵan AI Governance Cup ulttyq syılyǵynyń bastalǵanyn jarııalady.
- Memleket basshysy 2026 jyldy Tsıfrlandyrý jáne jasandy ıntellekt jyly dep jarııalady. Jasandy ıntellektini memlekettik basqarýdyń negizgi salalaryna engizý el damýynyń basym baǵyttarynyń biri retinde aıqyndaldy. Atalǵan syılyq qoldanbaly qundylyǵy men naqty ólshenetin nátıjelerin kórsetken jobalardy qoldaý arqyly qoıylǵan mindetterdi iske asyrýdyń praktıkalyq quralyna aınalady, - delingen habarlamada.
Syılyq memlekettik basqarýda tsıfrlandyrý jáne JI-sheshimderin engizý salasyndaǵy eleýli jetistikteri úshin konkýrstyq negizde tabystalady. Baıqaý alty nomınatsııa boıynsha ótkiziledi:
1. «AI Azamattarǵa Qyzmet» – halyqqa kórsetiletin qyzmetterdiń sapasyn arttyrýǵa baǵyttalǵan memlekettik sektordyń JI-jobalary.
2. «AI Ekonomıka» – ekonomıka salasyndaǵy JI-jobalar.
3. «AI Áleýmettik Saıasat» – áleýmettik saıasat salasyndaǵy JI-jobalar.
4. «AI Qaýipsizdik» – qaýipsizdik salasyndaǵy JI-jobalar.
5. «AI Óńir» – jergilikti atqarýshy organdar júzege asyrǵan JI-jobalar.
6. «AI Kvazısektor» – kvazımemlekettik sektor uıymdarynyń JI-jobalary.
Ótinimder 2026 jylǵy 3–13 naýryz aralyǵynda govtec.kz/ai-governance-cup saıtynda qabyldanady.
- AI Governance Cup jasandy ıntellektini engizýdiń úzdik tájirıbelerin tanystyrýǵa, memlekettik organdar arasynda tájirıbe almasýǵa jáne derekter men zamanaýı tehnologııalarǵa negizdelgen praktıkalyq sheshimderdi ilgeriletýge arnalǵan alańǵa aınalady, - dep málimdeıdi Jasandy ıntellekt jáne tsıfrlyq damý mınıstrligi.
Osyǵan deıin alem.ai battle jasandy ıntellekt baıqaýyna ótinim qabyldaý bastalǵany týraly jazdyq.
