Memorgandardyń óz bıýdjetterin túzetýi Parlament baqylaýynda bolýy qajet — JAP
ASTANA. KAZINFORM — Memlekettik qarjyny basqarý tujyrymdamasynda kózdelgen qoldanystaǵy shekteýlerdi kúsheıtý kerek. Bul týraly Parlament palatalarynyń birlesken otyrysynda Joǵary aýdıtorlyq palata tóraǵasy Álıhan Smaıylov aıtty.
Ol otyrysta Joǵary aýdıtorlyq palatanyń respýblıkalyq bıýdjettiń atqarylýyna qatysty keıbir negizgi usynysyna toqtaldy.
— Memlekettik organdarǵa óz bıýdjetterin 15 paıyz lımıt sheginde naqtylaýsyz túzetýge múmkindik berildi. Alaıda mundaı múmkindik qosymsha pysyqtaýdy talap etedi. Eger túzetilgen bıýdjetke qatysty eseptesek, onda nebári 8 túzetýdiń negizinde bastapqyda bekitilgen bıýdjetti tolyǵymen qaıta bólýge bolady. Іs júzinde jekelegen bıýdjettik baǵdarlamalar boıynsha mundaı qaıta bólý kólemi 90 paıyzǵa deıin jetti, — dedi ol.
Onyń atap ótýinshe, bul respýblıkalyq bıýdjet týraly zań jobasyn qaraý kezinde Parlamentte egjeı-tegjeıli talqylanyp, bekitilgen bıýdjet parametrlerinen edáýir aýytqý táýekelderin týdyrady. Osyǵan baılanysty, Parlamenttiń baqylaýynda bolýyn qamtamasyz ete otyryp, mundaı túzetýlerdiń kólemin shekteý qajet.
— Qarajat tapshylyǵy jáne shyǵystarǵa basymdyq berý mańyzdylyǵy jaǵdaıynda bloktyq bıýdjetteýdiń áseri shekteýli bolyp otyr. Pılottyq memlekettik organdar boıynsha tolyqqandy taldaý júrgizip, onyń qorytyndysy boıynsha tıisti sheshim qabyldaý kerek dep sanaımyz. Kovenanttardyń saqtalýyna jáne turaqty kredıttik reıtıngterge qaramastan, memlekettik boryshty basqarý ári qaraı jetildirýdi talap etedi. Memlekettik qarjyny basqarý tujyrymdamasynda kózdelgen qoldanystaǵy shekteýlerdi kúsheıtý kerektigine nazar aýdaramyz, — dedi Álıhan Smaıylov.
Joǵary aýdıtorlyq palata tóraǵasy bıýdjettiń óz kiristerine túsetin júktemeni, qaryzdy óteýge jumsalatyn shyǵystar kólemin, sondaı-aq jańa qaryzdardaǵy qaıta qarjylandyrý úlesin eskeretin qosymsha kórsetkishter qajet ekenin de atap ótti.
— Al qaryzdardy tartý ónimdiliktiń, eksporttyń ósýine, sondaı-aq olardyń salyq túsimine yqpal etý turǵysynan baǵalanýy tıis, — dedi ol.
Aıta keteıik, jalpy otyrysta Májilis pen Senat depýtattary Úkimettiń jáne Joǵary aýdıtorlyq palatanyń 2025 jylǵy respýblıkalyq bıýdjettiń atqarylýy týraly esepterin qarap jatyr.
