Memorgandardyń aktıvterin jekeshelendirý jol kartasy ázirlenip jatyr
ASTANA. KAZINFORM — Memlekettik organdardyń aktıvterin jekeshelendirý jol kartasy ázirlenip jatyr. Bul týraly Ulttyq ekonomıka mınıstrligi málim etti.
— Azamattyq kodekstiń 188-babynyń 3-tarmaǵyna sáıkes, menshik ıesi ózine tıesili múlikke qatysty qalaýy boıynsha kez kelgen áreketter jasaýǵa, onyń ishinde menshik ıesi bolyp qala otyryp, múlikti ıelený, paıdalaný jáne oǵan bılik etý jónindegi ókilettikterin basqalarǵa berýge, múlikti kepilge berýge jáne oǵan basqa da ádistermen aýyrtpalyq túsirýge, oǵan ózgeshe túrde bılik etýge quqyly.
Degenmen, Jekeshelendirý jónindegi ulttyq ofıs memlekettik organdardyń aktıvterin ótkizýdi usyndy. Qazirgi ýaqytta osy usynymdardy oryndaý jumysy júrgizilip jatyr.
Ofıs jospary aıasynda 2026 jylǵa arnalǵan jol kartalaryn jáne jekeshelendirýdiń bazalyq sharttaryn beıindi memlekettik organdarmen birlesip ázirleý bastaldy, — dedi mınıstrlikten agenttiktiń resmı saýalyna oraı.
Jol kartalarynda mynalar kózdeledi:
— jekeshelendiriletin kásiporyndar qyzmetiniń retteýshilik sharttaryn ózgertý;
— tarıf belgileýdiń yntalandyrýshy ádisnamasyn engizý;
— ózara sýbsıdııalaýdy kezeń-kezeńimen joıý;
— tarıftik retteýdi ortalyqsyzdandyrý;
— naryqty memlekettik sektorsyz turaqty jumys isteýge daıyndaýǵa baǵyttalǵan ózge de sharalar.
— Ofıstiń 2026 jylǵa arnalǵan josparynda jergilikti atqarýshy organdardyń, ortalyq memlekettik organdardyń jáne uıymdardyń teńgerimderindegi memlekettik organdar múlkine jekeshelendirý turǵysynan taldaý júrgizý de kózdelgen. Jekelegen naryqtardyń sezimtaldyǵyn eskere otyryp, salalyq mınıstrlikterdiń usynystary kelisilgen ustanymdy ázirleý úshin Ofıstiń qaraýyna shyǵarylady, — dedi vedomstvodan.
Buǵan deıin Premer-mınıstr jekeshelendirýge jatatyn aktıvterdiń jartysyn 2026 jyly satyp bitý kerektigin aıtqan edi.
