Memorgandardyń ákimshilik derekterinde qandaı qate jıi kezdesedi

ASTANA. KAZINFORM – Ulttyq statıstıka bıýrosy janynan memlekettik organdar ákimshilik derekteriniń durystyǵyn tekseretin ınstıtýt quryldy. Bul týraly Kazinform agenttiginiń resmı saýalyna Ulttyq statıstıka bıýrosy joldaǵan jaýapta aıtylǵan.

- «Memlekettik statıstıka týraly» QR Zańyna engizilgen ózgerister sheńberinde Ulttyq statıstıka bıýrosyna ákimshilik derekterdiń sapasyn anyqtaý boıynsha fýnktsııalar berilgen. Qoıylǵan mindetterdi iske asyrý maqsatynda «Qazaqstan Respýblıkasy Strategııalyq josparlaý jáne reformalar agenttigi Ulttyq statıstıka bıýrosynyń Aqparattyq-esepteý ortalyǵy» ShJQ RMK vedomstvolyq baǵynysty uıymynyń bazasynda derekterdi baqylaýshylar ınstıtýty quryldy, - delingen habarlamada.

Málimetke saı, derekterdi baqylaýshy – ákimshilik derekterdiń sapasyn baǵalaý úshin ákimshilik derekkózderge memlekettik baqylaý júrgizý kezinde tartylatyn statıstıka jáne memlekettik monopolııa sýbektisiniń aqparattyq-kommýnıkatsııalyq tehnologııalar salasyndaǵy mamany. Búgingi kúni derekter sapasyn baqylaý departamenti qyzmetkerleriniń sany - 10 adam.

Ákimshilik derekterdiń durystyǵyn baqylaý anomaldy mánderdi, qarama-qaıshylyqtardy, sáıkessizdikterdi anyqtaý arqyly júzege asyrylady. Sondaı-aq ákimshilik derekter dál osyndaı derekterdi jınaıtyn basqa da resmı derekkózderdiń málimetimen salystyrý arqyly tekseriledi.

Atalǵan ınstıtýt ótken jyly ortalyq memlekettik organdar ákimshilik derekteriniń sapasyna baǵalaý júrgizgen bolatyn. Sonyń nátıjesinde memlekettik organdarda kóbinde myna sanattaǵy qate málimetter kezdesetini anyqtaldy:

• Saı emes derekter jáne qate málimetter - jeke nemese bıznes sáıkestendirý nómirleri (JSN/BSN) etalondyq derekqordan tabylmaıdy nemese derbes derekterde qateler (ataýy, mekenjaıy jáne t.b.) bolady.
• Anomaldy mánder - ruqsat etilgen aýqymdardyń sheginen shyǵatyn mánder. Mysaly, avtokólik quraly massasynyń teris máni.
• Qaıtalanatyn mánder - bir obektige nemese tulǵaǵa jatatyn derekqordaǵy qaıtalanatyn jazbalar. Mysaly, bir eldi mekenniń (kenttiń, aýyldyq okrýgtiń, aýdannyń, qalanyń, oblystyń) sheginde ornalasqan úı sharýashylyqtary músheleri JSN-iniń qaıtalanýy.
• Ulttyq anyqtamalyq aqparat elementteriniń durys emes mánderi. Mysaly, ákimshilik-aýmaqtyq obektiler jikteýishiniń kúshi joıylǵan kodtary paıdalanylady.
• Eskirgen málimetter - taratylǵan kásiporyndarǵa, qaıtys bolǵan adamdarǵa nemese eskirgen mekenjaılarǵa qatysty aqparat. Mysaly, qaıtys bolǵan adamǵa nemese taratylǵan kásiporynǵa aýyl sharýashylyǵy janýarlary tirkelgen.
• Mindetti óristerdi toltyrmaý - derekterdi engizý kezinde toltyrý úshin mindetti óristerdi ótkizý. Mysaly, avtokólik quralynyń toltyrylmaǵan tehnıkalyq sıpattamalary (VIN-kod, shassı nómiri, avto ataýy).
• Derekterdiń salystyrmalylyǵy - ulttyq anyqtamalyq aqparattyń ózekti emes elementteriniń paıdalanylmaýy nemese paıdalanylmaýy, ýaqytsha, óńirlik jáne salalyq bóliniste ákimshilik derekterdiń salystyrmalylyǵy, sondaı-aq aqparatty usynatyn tulǵalardyń sheńberin sáıkestendirýdiń bolmaýy. Mysaly, aýyl sharýashylyǵy janýarlary boıynsha ákimshilik derekterdi jınaý kezinde sharýashylyq júrgizýdiń uıymdyq-quqyqtyq nysandarynyń anyqtamalyǵy paıdalanylmaıdy, bul aýyl sharýashylyǵy janýarlary bar jeke tulǵalar men jeke kásipkerler boıynsha derekterdi durys salystyrýǵa múmkindik bermeıdi.

Máselen, 2024 jyly ótkizilgen Aýyl sharýashylyǵy mınıstrligi aqparattyq júıeleri ákimshilik derekteriniń sapasyn baǵalaý kezinde maldyń ortasha bıologııalyq jasynan asatyn aýyl sharýashylyǵy janýarlary tirkelgeni anyqtalǵan. Naqty aıtqanda, 70 jastan asqan iri qara mal, 15 jastan asqan usaq mal anyqtalǵan. Odan bólek, taratylǵan uıymdardyń derekqorlarynda qaıtys bolǵan adamnyń atyna aýyl sharýashylyǵy tehnıkasy tirkelgeni anyqtaldy. Instıtýt osy sekildi jalǵan ne eskirgen málimetterdi anyqtap, túzetip, oǵan jol bermeý amaldaryn engizip, statıstıkalyq derektiń sapasyn arttyrady.

Eske sala keteıik, buǵan deıin elimizde statıstıka qalaı jasalatyny jaıly jazǵan edik.