Memorgandar jýrnalısterdi jylyna bir ret akkredıtatsııadan ótkizedi
Bıyl atalǵan erejelerge ózgeris engizildi. Al 13 aqpanda ony keńinen talqylaý sharalary bastaldy. QR Aqparat jáne kommýnıkatsııalar mınıstrliginiń eks vıtse-mınıstri Nurgúl Máýberlınovanyń aıtýynsha, jańa erejeler memlekettik organdarda bir jylǵa akkredıtatsııadan ótýge múmkindik beredi.
"Máselen, Májiliste jýrnalısterdi bir jylǵa akkredıtatsııalap qoıady. Demek, buqaralyq aqparat quraldary bir ret tirkeledi de, bir jyl boıy Májiliske kirip-shyǵa beredi. Biraq basqa memlekettik organdarda ondaı júıe joq. Al jańa erejelerge sáıkes, jýrnalıster bir-aq ret qajetti qujattardy jiberip, akkredıtatsııadan ótip alady da, boldy. Sóıtip, QR Aýyl sharýashylyǵy mınıstrligi, QR Bilim jáne ǵylym mınıstrligi, QR Densaýlyq saqtaý mınıstrligi jáne basqa da memlekettik organdar ótkizetin sharalarǵa kire berýge bolady. Qujattardy bir jiberesiz de, memlekettik organnyń tirkeýinde bir jyl boıy tura beresiz", - deıdi N.Máýberlınova.
Talqylaý barysynda jeke qujattarǵa qatysty máseleler de kóterildi. Máselen, akkredıtatsııa kezinde jýrnalıstiń eńbek shartyn talap etýi ábden múmkin. Qazirgi erejelerde ondaı tetikter bar. Budan bólek, is-sharada oryn jetispeı jatqanda buqaralyq aqparat quraldaryn ótkizbeý, mekemeniń ishki tártibi men moderatordyń reglamentine qatysty birqatar máseleler bar. Bunyń bári jýrnalısterdi tirkeýden ótkizý kezinde qıyndyqtar týǵyzýy yqtımal. Al keıbir jaǵdaılarda moderatordyń jeke ustanymyna qaraı yǵysýy ábden múmkin. Sol sebepti atalǵan máselelerdiń bári ary qaraı talqylanatyn bolady. Sonyń nátıjesinde naqty usynystardy ázirleý kózdelgen.
Aıta keteıik, buǵan deıin QR Aqparat jáne kommýnıkatsııalar mınıstri Dáýren Abaev jýrnalısterdi akkredıtatsııalaý erejelerin keńinen talqylaýdy tapsyrǵan bolatyn.
«Buqaralyq aqparat quraldaryn akkredıtatsııalaý erejeleriniń jobasyn erekshe atap ótkim kelip otyr. Vıtse-mınıstr Nurgúl Óserbaıqyzy Maýberlınovaǵa atalǵan jobany keńinen talqylaýdy tapsyramyn. Jýrnalısterdiń barlyq usynystary men eskertýlerin qamtý qajet. Akkredıtatsııalaý erejeleri tek konsensýs negizinde ǵana qabyldanýy shart. Buqaralyq aqparat quraldarynyń pikirlerin barynsha eskerý kerek», - dedi D.Abaev mınıstrliktiń alqa májilisinde.
Búgin QR Parlamenti Májilisiniń Áleýmettik-mádenı damý komıteti Dáýren Abaevty jańadan qurylǵan Aqparat jáne qoǵamdyq damý mınıstri laýazymyna maquldady.
