Memorgandar termınologııasyndaǵy aıyrmashylyqty joıý úshin ortaq glossarıı ázirlenedi
ASTANA. KAZINFORM – Memlekettik organdar termınologııasyndaǵy aıyrmashylyqty joıý úshin ortaq glossarıı ázirlenedi. Bul týraly Ulttyq bankten málim etti.
- Memleket basshysynyń Úkimettiń keńeıtilgen otyrysynda bergen tapsyrmasyna sáıkes, Jasandy ıntellekt jáne tsıfrlyq damý mınıstrligi Strategııalyq josparlaý jáne reformalar agenttigimen jáne Ulttyq bankpen kelisim jasasyp, derekterdi basqarýdyń birtutas ınfraqurylymyn qalyptastyrý tásilderin ázirlep jatyr. Osy tapsyrmany iske asyrý aıasynda derekterdi basqarý júıesin memlekettik deńgeıde jetildirý baǵytynda júıeli jumys atqarylyp jatyr. Bul rette vedomstvolar arasyndaǵy fýnktsııalardy naqty bólý máselesi de qarastyrylady. Sonymen qatar metaderekti júıeleýdiń biryńǵaı tásilderin engizip, memlekettik organdar termınologııasyndaǵy aıyrmashylyqty joıý úshin ortaq glossarıı qalyptastyrý jumystary da pysyqtalyp jatyr, - dedi Ulttyq bank agenttiktiń resmı saýalyna bergen jaýabynda.
Sondaı-aq qarjy retteýshisi derekti saqtaý, óńdeý jáne tekserýdiń zamanaýı quraldaryn engizý, barlyq qatysýshy organdar arasynda ortaq ádisnamalyq tásilderdi qalyptastyrý da josparlarynda bar ekenin atap ótedi.
- Ulttyq bank qarjy naryǵy baǵyty boıynsha memlekettik derekterdi basqarýdyń turaqty ári tıimdi júıesin qalyptastyrýǵa belsendi qatysyp, osy sektorǵa qatysty ádisnamalyq qoldaý kórsetedi,- dedi ortalyq bankten.
Buǵan deıin Prezıdent memlekettik málimetterdi basqarýdyń birtutas júıesin qurýdy tapsyrǵan edi.
