Memorgandar óz bastamasymen obektıvti resmı aqparatty halyqqa jetkizýge mindetti – Bektenov

ASTANA. KAZINFORM – Memlekettik organdar óz bastamasymen obektıvti resmı aqparatty halyqqa jetkizýge mindetti. Bul jaıynda Senat depýtattarynyń saýalyna Premer-Mınıstr Oljas Bektenovtiń jaýabynda  aıtylǵan.

- Memlekettik organdardyń saıttarynda aqparattyń azamattarǵa (onyń ishinde múgedektigi bar adamdarǵa) qoljetimdi ári yńǵaıly bolýy – «Halyq únine qulaq asatyn memleket» qaǵıdatyn sapaly iske asyrýdyń negizi. Bul másele Úkimettiń turaqty baqylaýynda jáne týyndaǵan máseleler Mádenıet jáne aqparat mınıstrligi janyndaǵy Aqparatqa qol jetkizý máseleleri jónindegi komıssııanyń jumysynda qaralady. Komıssııa quramyna Senat pen Májilis depýtattary, memlekettik organdardyń, ÚEU, BAQ jáne múgedektigi bar adamdardyń ókilderi engen, - dedi Úkimet basshysy jaýabynda.

Onyń atap ótinshe, 2025 jyldyń qańtar aıynda «Aqparatqa qol jetkizý týraly» Zańǵa túzetýler engizilip, Mádenıet jáne aqparat mınıstrligine aqparatqa qol jetkizý salasynda memlekettik baqylaý quzyreti berildi. Aqparat ashyqtyǵynyń prezýmptsııasy bekitildi. Bul - memlekettik organdardyń barlyq aqparatynyń ashyqtyǵynyń qaǵıdaty.

- Zańda múgedektigi bar adamdardyń múddelerin esepke alý qaǵıdaty jáne olar úshin aqparattyń qoljetimdiligin qamtamasyz etý máseleleri jeke bap retinde qarastyryldy. Sonymen qatar aqparatty proaktıvti taratý uǵymy jáne ony iske asyrý tetigi engizildi. ıAǵnı, memlekettik organdar óz bastamasy boıynsha (suraý salmaı) obektıvti resmı aqparatty halyqqa jetkizýge mindetti boldy. Tutastaı alǵanda, túzetýlerdiń negizinde memlekettik organdardy monıtorıngileý men baqylaý edáýir kúsheıtildi, - dedi Oljas Bektenov.

Aıta keteıik, memlekettik organdarǵa úsh jylǵa ákimshilik ǵımarattar salýǵa tyıym salynady.