Memorgandar moratorııge qaramastan, qyzmettik kólik satyp alǵan

NUR-SULTAN. QazAqparat - Memlekettik organdar moratorııge qaramastan qyzmettik kólik satyp alýdan tyıylmaı otyr. Bul týraly QR Qarjy mınıstrligi Memlekettik satyp alýlar zańnamasy departamentiniń dırektory Sábıt Ahmetov aıtty, dep habarlaıdy QazAqparat tilshisi.

«Ákimdikterdiń tarapynan kólik satyp alýdyń biren-saran deregi bar. Degenmen, kóp jaǵdaıda ákimdikter normatıvtik-quqyqtyq aktilerde kórsetilgen tehnıkalyq sıpattama sheginde satyp alǵan. Jekelegen derekterge keler bolsaq, olarǵa qatysty tekserý júrip jatyr. Qorytyndysy boıynsha qosymsha aqparat beretin bolamyz», - dedi ol Ortalyq kommýnıkatsııalar qyzmetindegi baspasóz máslıhatynda.

Onyń dereginshe, jeńil kólikterdi negizinen Іshki ister mınıstrligi jáne óńirlik polıtsııa departamentteri satyp alǵan.

«Avtokólik satyp alý sany jaǵynan ekinshi orynda sanıtarlyq-epıdemıologııalyq qyzmet tur. Bul - mobılızatsııalyq daıyndyq qyzmetteri, tótenshe jaǵdaılar qyzmeti. Aıta keterligi, avtokólikterdiń basym bóligi jarııalanǵan moratorıı boıynsha belgilengen shekteý sheginde satyp alynǵan. Onda eki shekteý bar. Birinshiden, jeńil avtokólik qozǵaltqyshynyń kólemi 2 tekshe metrden aspaýy jáne bazalyq jıyntyqtan joǵary bolmaýy tıis. Ekinshiden, atalǵan avtokólik quraldary otandyq óndiristen shyǵý qajet. Jalpy, avtokólik quraldarynyń barlyǵy da otandyq taýar óndirýshilerden satyp alynǵan», - dedi Sábıt Ahmetov.