Memorgandar eńbekaqy tóleýdiń jańa júıesine tolyqtaı qashan kóshedi
NUR-SULTAN. QazAqparat - Internet-konferentsııada QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Aıgúl Shaıymova memorgandardyń faktorlyq-baldyq shkalaǵa negizdelgen eńbekaqy tóleýdiń jańa júıesine kóshýi jóninde saýalǵa jaýap berdi, dep habarlaıdy QazAqparat tilshisi.
Atap aıtqanda, «Ashyq dıalog» portalynda onlaında ótip jatqan ınternet-konferentsııada faktorlyq-baldyq shkalany engizý men ákimshilik memlekettik qyzmetshilerdiń eńbekaqysyn kóterý týrasynda suraldy.
«Qaı jyldan bastap faktorlyq-baldyq shkala qalǵan memlekettik organdarda engiziledi?», - delingen saýalda.
Aıgúl Shaıymova Elbasynyń tapsyrmasy boıynsha ótken jyldan beri keıbir memlekettik organdarda (Ádilet mınıstrligi, agenttik, Astana qalasy men Mańǵystaý oblysy ákimdikteri, al 2018 jyldyń jeltoqsanynan Almaty men Shymkent ákimdikteri) faktorlyq-baldyq shkalaǵa negizdelgen eńbekaqy tóleýdiń jańa júıesi qanatqaqty rejimde engizilgenin eske saldy. Aıaqtaý merzimi retinde 2019 jyldyń 31 jeltoqsany aıqyndaldy.
Osy oraıda memlekettik organdardyń jańa tólem modeline kóshý merzimderi memlekettik organdardyń bıýdjet shyǵystaryn ońtaılandyrý jáne únemdeý jónindegi jumys nátıjelerin eskere otyryp aıqyndalady.
«Jobany ary qaraı masshtabtaý úshin eńbekti tóleýge shyǵystardyń ósimi bıýdjettik shyǵyndardy únemdeý men ońtaılandyrý esebinen qamtamasyz etilýi tıis. Osyǵan baılanysty qazirgi kezde memorgandar eńbekti tóleýdiń jańa júıesine kóshý úshin tıisti qarjyny qarastyrýda. Sondyqtan osy modelge aýysý merzimi memorgandardyń jumysy nátıjesin eskere otyryp, atalǵan qanatqaqty joba qorytyndysy boıynsha aıqyndalady», - dedi A. Shaıymova.
