Memorgandar bıýdjetke túzetýler engizý quqyǵymen tym áýestenip ketti – Erlan Qoshanov
ASTANA. KAZINFORM – Búgin Májilistiń jalpy otyrysynda palata tóraǵasy Erlan Qoshanov Úkimet pen Joǵary aýdıtorlyq palatanyń 2025 jylǵy respýblıkalyq bıýdjettiń atqarylýy týraly esebiniń ereksheligin atap, birqatar máselege aıryqsha toqtaldy.
– Búgin biz Úkimet pen Joǵary aýdıtorlyq palatanyń 2025 jylǵy respýblıkalyq bıýdjettiń atqarylýy týraly kezekti esebin qaradyq. Jalpy, Úkimet kóp jumys atqardy. El ekonomıkasy damýynda turaqtylyq baıqalady. Jalpy ishki ónim ósimi boljanǵan kórsetkishten de, ótken jylǵy deńgeıden de asyp tústi. Muny usynylǵan esepter de rastaıdy, - dedi ol.
Osy rette palata tóraǵasy eseptiń ereksheligine toqtaldy.
– Parlament alǵash ret memlekettik qaryzdyń, bıýdjetten tys qorlardyń jaı-kúıi, kvazımemlekettik sektordyń qyzmeti týraly keńirek aqparat aldy. Bul jan-jaqty talqylaýǵa múmkindik berdi. Osy talqylaýdyń maqsaty – kinálini izdeý emes, aldaǵy jumysymyzda nazar aýdarýǵa qajetti sheshimder tabý. Atap aıtqanda, bıýdjet saıasaty men zańnamany jetildirýge qatysty usynystar berý, - dedi ol.
Sonymen qatar ol birneshe máselege erekshe toqtaldy.
– Birinshi. Jańa Bıýdjet kodeksinde biz Úkimetke Parlamenttiń qatysýynsyz óz betinshe 15 paıyz sheginde túzetýler engizý quqyǵyn berdik. Qazirgi tańda memlekettik organdar osy múmkindikpen tym áýestenip ketkenin kórip otyrmyz. Tipti keıbir jekelegen salalarda shyǵystar 59 paıyzǵa deıin ózgertilgen. Jalpy segiz túzetý jasalǵan. Bul eń aldymen bıýdjet baǵdarlamalaryn bastapqy josparlaýdyń jetkilikti deńgeıde oılastyrylmaǵanyn kórsetedi. Sondyqtan bolashaqta osy normany Bıýdjet kodeksinde qaıta qaraǵan jón dep sanaımyn. Bıýdjettik túzetýlerdiń naqty shegin bekitý qajet, - dedi Erlan Qoshanov.
Májilis spıkeri, ekinshi másele retinde byltyr damý bıýdjetiniń úlesi 8,1-den 6,4 paıyzǵa deıin qysqarǵanyna toqtaldy.
– Árbir besinshi ınvestıtsııalyq joba 2025 jyly aıaqtalmaı qalǵan. Alaıda eldiń ekonomıkalyq ósimine berik negiz qalaıtyn ne? Ol – árıne, ınfraqurylymǵa, óndiriske, ınnovatsııa men adamı kapıtalǵa salynǵan ınvestıtsııa. Al biz osy baǵyttaǵy damý bıýdjetiniń tıisti deńgeıde atqarylmaı jatqanyn kórip otyrmyz. Birinshi kezekte, aǵymdaǵy máselelerge emes, eldi damytýǵa arnalǵan shyǵystarǵa basymdyq berilýge tıis, - dedi ol.
Erlan Qoshanov úshinshi másele retinde 2025 jyly kósheler men saıabaqtardy abattandyrý, kóshelerdi jaryqtandyrý jobalary Ulttyq qordan qarjylandyrylǵanyna toqtaldy.
– Bul Qor qarajatyn paıdalaný saıasatyna túbegeıli qaıshy keledi. Ulttyq qor qarajatyn tek memlekettik mańyzy bar jobalarǵa baǵyttaýǵa tıispiz. Sondyqtan Úkimet Ulttyq qor esebinen qarjylandyrylatyn jobalarǵa monıtorıng júrgizip, tıisti qorytyndy shyǵarýy kerek. Ol týraly biz jyl saıyn aıtyp kelemiz. Tórtinshi. Biz jalpy ishki ónimniń ósimi jóninde aıtyp jatyrmyz. Biraq bıýdjet túsimderiniń jospary oryndalmaǵan. Kiristerdi josparlaý kezinde is-sharalardyń jete oılastyrylmaǵany aıqyn kórinip tur. ıAǵnı, bıýdjet kiristeri ekonomıkanyń oń qarqynynan artta qalyp otyr. Búgin bul másele depýtattar tarapynan biraz synǵa ushyrady. Osyǵan baılanysty bıýdjet kiristerin obektıvti túrde boljaý qajet, - dedi Erlan Qoshanov.
Aıta keteıik, Májilistiń jalpy otyrysynda QR Úkimetiniń jáne Joǵary aýdıtorlyq palatanyń 2025 jylǵy respýblıkalyq bıýdjettiń atqarylýy týraly esebi talqylandy.
