Memorgandar basshylarynyń blog-tuǵyrnamasyna aı saıyn 4 myńdaı aryz túsedi
ASTANA. QazAqparat - Elimizde memlekettik organdar basshylarynyń blog-tuǵyrnamasyna aı saıyn 4 myńǵa jýyq aryz-shaǵym túsip otyrady. Bul týraly búgin QR Investıtsııalar jáne damý mınıstrliginiń Baılanys, aqparattandyrý jáne aqparat komıteti men BUU salalyq komıteti birlesip ótkizgen «ashyq málimetter» semınary barysynda atalǵan komıtet tóraǵasy Sáken Sársenov aıtty.
«Ashyq úkimet» qalyptastyrý 2010 jyly elektrondy úkimet portalynda blog-tuǵyrnamalar men ınternet-konferentsııalar ashýmen bastalǵan bolatyn. Sandarǵa keler bolsaq, sońǵy 5 jylda memorgandar basshylarynyń blog-tuǵyrnamalaryna 290 myńdaı aryz-shaǵym túsken, bul aı saıyn 4 myńdaı aryz túsedi degen sóz», - dedi S.Sársenov.
Onyń aıtýynsha, qazirgi ýaqytta Qazaqstanda «ashyq málimetterdiń» biryńǵaı portaly jumys isteıdi. Onda densaýlyq saqtaý, bilim, kólik jáne kommýnıkatsııa, áleýmettik qamsyzdandyrý jáne basqa da salalar boıynsha 180 túrli málimet alýǵa bolady. Sonymen qatar, ázirlenip jatqan zań jobalaryn, memlekettik qyzmet standarttaryn jáne basqa da normatıvtik-quqyqtyq aktilerdi talqylaýǵa arnalǵan biryńǵaı «alań» da bar. «Sondaı-aq, «ashyq úkimetti» odan ári damytý maqatyna arnalǵan aqparattandyrý týraly jańa zań jobasy qazir QR Parlamentinde talqylaýda jatyr. Onda «ashyq úkimet» pen «ashyq málimet» boıynsha barlyq normalar naqty jazylǵan. Sonymen qatar, «ashyq bıýdjet» pen «ashyq petıtsııalar» týraly jańa modýlder jasaý da josparlanyp otyr», - dep túsindirdi ol. Aıta keteıik, semınar jumysyna memlekettik organdar qyzmetkerleri, halyqaralyq uıymdar ókilderi, sondaı-aq «ashyq málimettermen» qamtamasyz etý salasynyń sarapshylary qatysýda.
