Memorgandar aqparatty 15 kúnde beredi
ASTANA. QazAqparat - Memlekettik organdar halyqtyń kez-kelgen saýalyna 15 kúnniń ishinde sapaly, tolyq, túsinikti jaýap qaıtarýǵa mindetteledi. Bul týraly 30 qyrkúıekte Májiliste «Aqparatqa qoljetimdilik týraly» zań jobasyn tanystyrǵan Májilis depýtaty, halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev málimdedi. Onyń aıtýynsha, qazirgi kezde memlekettik organdardyń halyqqa aqparat berýine 30 kún ketetin bolsa, ol endi 15 kúnge deıin qysqarady.
«Ekinshiden, memlekettik organdardyń ǵalamtorda ornalastyratyn aqparattarynyń egjeı-tegjeıli tizimi rettelýde. Halyq suraý salmaı-aq, ǵalamtorǵa kirip, ózine kerekti aqparatty erkin alatyn jaǵdaı týǵyzylady. Sondyqtan ǵalamtorda qandaı dárejedegi aqparat ornalastyrylatyny naqty jazylýda»,- dep túsindirdi zań jobasynyń jańalyqtaryn Máýlen Áshimbaev. Úshinshiden, ákimder sııaqty mınıstrler de halyqtyń aldynda jyl saıyn esep beredi. Zań jobasynda osy esep berýdi ótkizýdi retteıtin norma engizilgen. Depýtattyń aıtýynsha, munyń mehanızmi mynadaı bolmaq: Mınıstrler óz salasy boıynsha jylyna bir ret jurtty jınap, onyń aldynda esep beredi. Jıynǵa atalǵan salanyń mamandary, abyroıly tulǵalary shaqyrylady. Al esep berýdi ótkizý rásimin qoǵamdyq keńester uıymdastyrady. «Eń bastysy, esep berý formaldy túrde bolmaýy kerek. Salanyń barlyq túıitkildi máseleleri ashyq aıtylýy tıis. Biz qazir osy esepterdi onlaın-júıesinde halyqqa taratý jaǵyn da qarastyryp jatyrmyz»,- dedi M. Áshimbaev.
Jańa zańnyń jańalyqtarynyń biri - «Elektrondy Úkimettiń» veb-portalynda «biryńǵaı tereze» ashý bolyp tabylady. «Biryńǵaı terezede» memlekettik organdardyń normatıvtik-quqyqtyq aktilerimen qosa, bıýdjet esebi men aýdıt jáne qarjylyq baqylaý nátıjeleri, memlekettik organdardyń qyzmetin baǵalaý jónindegi aqparat, strategııalyq josparlar men aımaqtardy damytý baǵdarlamasynyń maqsatty ındıkatorlaryna qol jetkizý týraly esep jarııalanady. Óz kezeginde mundaı noý-haý halyqqa qyzyǵýshylyq tanytqan aqparatyn jedel alýyna múmkindik beredi. Máýlen Saǵathanulynyń aıtýynsha, memlekettik organdar halyqqa, bıznes ókilderine qupııa aqparattan basqa aqparattyń bárin berýge mindetteledi. Al BAQ ókilderi ondaı aqparatqa suraý salsa, ol «BAQ týraly» zańnyń aıasynda retteledi.
Zań jobasyn ázirleýshilerdiń aıtýynsha, aqparatty bermegen, burmalaǵan memlekettik qyzmetshilerge aıyppul salynady. Máýlen Áshimbaev bul týraly mynadaı túsinik berdi: «Eger de suraý salynǵan aqparat berilmese nemese jalǵan aqparat berilse, sondaı-aq shekteýli aqparatqa jatpaıtyn aqparatty qandaı da bir sebeppen soǵan jatqyzsa, aqparat ıelenýshiler aıyppul tóleýge mindetti bolady. Ártúrli jaǵdaılarda bul aıyppuldardyń kólemi 20 AEK-ten 50 AEK-ke deıin ósip otyrady». Depýtattyń pikirinshe, bul zań jobasynyń negizgi qaǵıdaty - halyqqa der kezinde jyldam, sapaly aqparat berý. Sol sebepten qaýipsizdik (sonyń ishinde terrorızm men ekstremızm de bar), naryq ekonomıkasy, áleýmettik, ekologııalyq máselelerge qatysty naqty aqparattardy halyqqa jyldam jetkizý jónindegi norma zańdyq qujatqa engizilgen. Ámirlan Álimjan
