Memorgandar 1 naýryzǵa deıin aqparattyq júıelerin ıntegratsııalaıtyn boldy

NUR-SULTAN. QazAqparat - Memlekettik organdardyń aqparattyq júıelerin ıntegratsııalaý jumysy 1 naýryzǵa deıin aıaqtalýy tıis. Bul týraly búgin Úkimet otyrysynda QR Premer-Mınıstri Asqar Mamın aıtty, dep habarlaıdy QazAqparat tilshisi.

«Elbasy men Memleket basshysy tsıfrlandyrý máselesine erekshe kóńil bóledi. Úkimettiń keńeıtilgen otyrysynda Memleket basshysy tsıfrlandyrý salasyndaǵy jumysty óte mańyzdy dep atap ótip, osy baǵyttaǵy jumysty jyldamdatýdy, naqty nátıjege qol jetkizýdi tapsyrdy. Osyǵan oraı birqatar máseleni atap ótemin. Birinshi - aqparattyq júıelerdiń ıntegratsııasy. Úkimettiń keńeıtilgen otyrysynda Memleket basshysy 2019 jyly 40 aqparattyq júıeni ıntegratsııalaý jumysy atqarylmaǵanyn atap ótti. Mysaly, Іshki ister, Densaýlyq saqtaý, Indýstrııa, Ulttyq ekonomıka jáne Qorǵanys mınıstrlikteri ıntegratsııa josparyn oryndamaǵan», - dedi Asqar Mamın.

Úkimet basshysy bul jumysty erekshe baqylaýǵa alyp, 1 naýryzǵa deıin aıaqtaý qajettigin eskertti.

«Barlyq memlekettik organ basshylary aqparattyq júıelerdiń ýaqytyly ıntegratsııalanýyn jáne olardyń turaqty jumysyn qamtamasyz etetin jaýapty orynbasaryn belgilesin. Asqar Qýanyshuly, bıylǵa arnalǵan ıntegratsııa josparynyń oryndalý barysy týraly Úkimetke aı saıyn aqparat berip turyńyz. Qajet bolsa, artta qalyp qoıǵan memlekettik organdardyń jaýapkershiligin qaraý týraly usynys berińiz», - dedi Premer Mınıstr QR Tsıfrlyq damý, ınnovatsııa jáne aeroǵarysh ónerkásibi mınıstri Asqar Jumaǵalıevke qarata.