Memorgan basshylary Prezıdent Joldaýyn iske asyrý josparynyń sapaly oryndalýyn qamtamasyz etýi tıis - Bektenov

ASTANA. KAZINFORM – Memlekettik organdardyń birinshi basshylary Prezıdent Joldaýyn iske asyrý josparyndaǵy is-sharalardyń sapaly ári ýaqytyly oryndalýyn qamtamasyz etýge tıis. Mundaı tapsyrmany búgin Úkimet otyrysynda Premer-mınıstr Oljas Bektenov berdi.

- Memleket basshysy Joldaýda elimizdi damýdyń jańa deńgeıine kóterý úshin júıeli is-sharalar keshenin qabyldaýdy tapsyrdy. Úkimettiń aldyna ekonomıkaǵa, agrosektorǵa jáne logıstıka men turǵyn úı-kommýnaldyq sharýashylyq salasyna tsıfrlyq sheshimder men jasandy ıntellektini engizý boıynsha naqty mindetter qoıyldy. Biz Prezıdenttiń ınvestıtsııalyq ahýaldy jaqsartý, negizgi salalardy jańǵyrtý, memlekettiń tıimdiligin arttyrý jáne muqtaj adamdardy áleýmettik qamsyzdandyrýǵa baǵyttalǵan strategııalyq bastamalaryn iske asyrý úshin nátıjeli sharalar qabyldaımyz, - dedi Úkimet basshysy.

Onyń atap ótýinshe, jappaı tsıfrlyq transformatsııa, ekonomıkany jańǵyrtý jáne adam kapıtalyn nyǵaıtý arqyly elimizdiń ornyqty damýyn qamtamasyz etýimiz qajet.

- Memleket basshysynyń Joldaýyn iske asyrý jónindegi jalpyulttyq is-sharalar jospary alǵa qoıylǵan mindetterge saı keledi. Memlekettik organdardyń birinshi basshylary jospardaǵy is-sharalardyń sapaly ári ýaqytyly oryndalýyn qamtamasyz etýge tıis. Barlyq qarjylandyrý máselesin shuǵyl sheshý qajet, - dedi Oljas Bektenov.

Aıta keteıik, otyrysta Mınıstrler kabıneti Memleket basshysy Qasym-Jomart Toqaevtyń Qazaqstan halqyna Joldaýyn júzege asyrý jónindegi Jalpyulttyq is-sharalar josparyn maquldaǵan edi.