Memlekettiń satyp alý júıesin tsıfrlyq teńgege kóshiremiz — Tımýr Súleımenov
ASTANA. KAZINFORM — Ulttyq bank tóraǵasy Tımýr Súleımenov kezekti baspasóz máslıhatynda memlekettiń satyp alý júıesindegi jemqorlyqqa tsıfrlyq teńge arqyly tosqaýyl qoıý jospary bar ekenin málim etti.
«Biz tsıfrlyq teńge boıynsha Ulttyq qordan alynǵan transfertpen qanatqaqty jobany bastadyq. „Dostyq-Moıynty“ temirjol jobasyna bólingen qarajatty smart-kelisimshart bazasynda qaǵaz aqshamen emes, tsıfrlyq teńgemen aýdardyq. Qazir bul jumys istep tur. Osyndaı jumysty Aýyl sharýashylyǵy mınıstrligimen de júrgizip jatyrmyz. „Aýyl amanaty“ baǵdarlamasy boıynsha bólingen sýbsıdııa qaǵaz aqsha kúıinde emes, tsıfrlyq teńge kúıinde túsedi dep otyrmyz. Bul sýbsıdııany kim alǵanyn, qalaı jumsap jatqanyn, ótinimge saı jumsap jatyr ma, álde aldap ketti me, bárin kórýge bolady. Ónerkásip sýbsıdııalarymen de sondaı jumys istelip jatyr. Memlekettik satyp alýǵa da osy tájirıbeni taratamyz», — dedi ol jýrnalıst suraǵyna bergen jaýabynda.
Ulttyq bank basshysy qanatqaqty joba sátti iske assa, tsıfrlyq teńgeniń qoldanys aıasy keńeıe túsetinin aıtady.
«Bul jerde Qarjy mınıstrligimen jáne Sybaılas jemqorlyqqa qarsy is-qımyl agenttigimen jaqsy ıntegratsııamyz bar. Jalpy bul joba sátti shyqsa, memlekettik satyp alý, qurylys sııaqty salalardy ashyq etýdegi asa mańyzdy kezeń bolatyn túri bar. Sonyń arqasynda bul aqshany durys emes jolmen jumsaǵysy keletinderdiń sany azaıady dep úmittenemin. Byltyr qarasha aıynda tsıfrlyq teńgeniń qoldanysqa enip bastaǵanyn jarııaladyq qoı, Qarjygerler kúninde osy jobanyń alǵashqy qorytyndysyn jarııa etemiz. Sarapshylarǵa da, barsha jurtqa qyzyq bolady dep oılaımyn», — dedi Tımýr Súleımenov.
