Memlekettikten bólek qandaı bilim granttaryn utyp alýǵa bolady

Joǵary oqý oryndary rektorynyń granttary

Elimizdiń kóptegen joǵary oqý oryndary jyl saıyn óz qarajaty esebinen rektor granttaryn taǵaıyndaıdy. Mundaı granttardyń sany, oǵan qatysý talaptary men kimderge beriletini ár ýnıversıtettiń ishki erejesine sáıkes naqtylanady.

Ádette rektor granttary UBT-dan joǵary nátıje kórsetken talapkerlerge, pándik olımpıadalar men ǵylymı baıqaýlardyń jeńimpazdaryna, sondaı-aq áleýmettik sanattaǵy azamattarǵa usynylady.

Sonyń bir mysaly — «Turan-Astana» ýnıversıteti. Munda negizgi UBT-da 100-den joǵary ball jınaǵan jáne «Altyn belgi» ıegerlerine 4 jyldyq rektor granty usynylady.

Konkýrsqa qatysý úshin talapker negizgi UBT-dan keminde 100 ball jınaýy kerek jáne «Altyn belgi» ıegeri bolýy tıis.

Al halyqaralyq, respýblıkalyq nemese oblystyq olımpıadalar men ǵylymı baıqaýlardan alǵan dıplomdary men gramotalary bolsa, artyqshylyq retinde eskeriledi.

Qujat tapsyrý kezinde tańdaǵan joǵary oqý oryndarynyń tiziminde «Turan-Astana» ýnıversıtetin birinshi orynǵa kórsetý kerek (kody — 184).

Bul rette «Aýdarma isi» bilim berý baǵdarlamasyna túsýshiler úshin IELTS halyqaralyq sertıfıkatynyń keminde 6.0 deńgeıindegi nátıjesi de mindetti talaptardyń biri ekenin eskerý kerek.

Konkýrsqa qujat qabyldaý 1 shildeden 23 tamyzǵa deıin jalǵasady. Al jeńimpazdar 24 tamyzda belgili bolady.

Ákimdikterdiń granttary

Jyl saıyn oblystar men respýblıkalyq mańyzy bar qalalardyń ákimdikteri de qosymsha bilim granttaryn bóledi.

Bul granttar óńirlerge qajetti mamandardy daıarlap qana qoımaı, sondaı-aq halyqtyń áleýmettik osal toptaryna qoldaý kórsetedi.

Granttardyń sany, bilim berý baǵdarlamalarynyń tizimi, konkýrsqa qatysý talaptary men qujat qabyldaý merzimderin jyl saıyn jergilikti atqarýshy organdar belgileıdi. Al granttardy taǵaıyndaý týraly sheshimdi ákimdik janynan qurylǵan arnaıy komıssııa qabyldaıdy.

Tolyq aqparatty ákimdikterdiń bilim basqarmalarynan jáne joǵary oqý oryndarynyń qabyldaý komıssııalarynan bilýge bolady.

Jumys berýshiler bóletin maqsatty granttar

Keıbir kompanııalar joǵary oqý oryndarymen kelisim negizinde stýdentterdiń oqý aqysyn qarjylandyrady. Mundaı granttar belgili bir salaǵa qajetti mamandardy daıarlaýǵa arnalǵan.

Kóp jaǵdaıda mundaı grantty ıelengen túlek oqýyn aıaqtaǵannan keıin qarjylandyrýdy qamtamasyz etken uıymda jumys isteýge mindetteledi. Konkýrsqa qatysý talaptaryn jumys berýshi men joǵary oqý orny birlesip belgileıdi.

Jekemenshik qorlar men demeýshilerdiń granttary

2026 jyly «Qazaqstan halqyna» qoǵamdyq qory 350 bilim grantyn bóledi.

Grant aıasynda bir akademııalyq oqý jyly úshin 1 mln teńgege deıingi oqý aqysy tólenedi jáne oqý jylynyń on aıy boıy aı saıyn 60 myń teńge kóleminde shákirtaqy beriledi.

Konkýrsqa aýyldyq eldi mekenderden jáne shaǵyn qalalardan shyqqan, jasy 25-ten aspaǵan mektep túlekteri qatysa alady. Sonymen qatar olar tómendegi sanattardyń birine jatýy tıis:

• jetim balalar jáne kámeletke tolǵanǵa deıin ata-anasynyń qamqorlyǵynsyz qalǵan balalar;
• múgedektigi bar adamdar;
• múgedektigi bar bala tárbıelep otyrǵan otbasylardyń balalary.

Bul baǵdarlama qaıtarymsyz negizde júzege asyrylady, ıaǵnı grant ıegerleri oqýyn aıaqtaǵannan keıin mindetti túrde jumys óteýge nemese bólingen qarajatty qaıtarýy mindetti emes.

Qujat qabyldaý 2026 jylǵy 1-17 tamyz aralyǵynda seriktes joǵary oqý oryndarynyń qabyldaý komıssııalary arqyly júrgiziledi.

Konkýrs qorytyndysy 11 qyrkúıekke deıin qordyń resmı saıtynda jarııalanady. Baǵdarlamaǵa 44 joǵary oqý orny qatysady.

Baǵdarlamaǵa qatysatyn 44 joǵary oqý ornynyń tolyq tizimi men qajetti qujattar týraly aqparat qazaqstanhalqyna.kz saıtynda ornalastyrylǵan.

«Qazatomónerkásiptiń» Murager baǵdarlamasy

«Qazatomónerkásip» ulttyq atom kompanııasy» AQ 2023 jyldan beri Murager bilim granttaryn usynatyn áleýmettik baǵdarlamany júzege asyryp keledi.

Baǵdarlama kompanııa kásiporyndary ornalasqan Qyzylorda, Túrkistan, Shyǵys Qazaqstan jáne Aqmola oblystaryndaǵy talapkerler men kolledjder jáne joǵary oqý oryndarynyń 1-3 kýrs stýdentterine arnalǵan.

Baǵdarlama aıasynda qatysýshylar elimizdegi tehnıkalyq kolledjder men joǵary oqý oryndarynda bir akademııalyq oqý jylyna arnalǵan tegin bilim grantyna ıe bolady.

Talapkerlerge geologııa, elektr energetıkasy, organıkalyq jáne beıorganıkalyq zattardyń hımııalyq tehnologııasy, avtomattandyrý jáne basqarý, metallýrgııa, ekologııa jáne basqa da basym baǵyttar boıynsha bilim alýǵa múmkindik bar.

Oqý úlgerimi joǵary bolyp, jyl saıyn belgilengen GPA talaptaryn oryndaǵan qatysýshylar kelesi oqý jylynda da Murager bilim granty boıynsha oqýyn jalǵastyra alady.

Bul baǵdarlama da qaıtarymsyz negizde júzege asyrylady jáne oqý aıaqtalǵannan keıin mindetti eńbek óteýdi talap etpeıdi.

Baǵdarlamaǵa qatysý úshin úmitkerge talap tómendegideı:

• Qazaqstan Respýblıkasynyń azamaty bolýy;
• jasy 30-dan aspaýy;
• «Qazatomónerkásip» kásiporyndary ornalasqan óńirlerdiń birinde turaqty turýy;
• oqý úlgerimine qatysty konkýrs talaptaryna sáıkes kelýi qajet.

Ótinim qabyldaý 10 shildede murager.kazatomprom.kz saıtynda bastalady.

«Serpin» baǵdarlamasy

Tegin joǵary bilim alýdyń taǵy bir múmkindigi — memlekettik «Serpin» baǵdarlamasy. 2026 jyly bul baǵdarlama aıasynda 2 180 bilim granty bólingen.

Baǵdarlama elimizdiń halqy tyǵyz ornalasqan óńirlerindegi (Túrkistan, Qyzylorda, Jambyl, Almaty oblystary jáne Jetisý oblysy) aýyl mektepteriniń túlekterine arnalǵan. Onyń maqsaty — maman tapshy óńirler úshin bilikti kadrlar daıarlaý.

Baǵdarlamaǵa qatysýshylar Qazaqstannyń soltústik, shyǵys jáne ortalyq óńirlerindegi joǵary oqý oryndarynda bilim alady.

Granttar negizinen pedagogıkalyq, IT, tehnıkalyq jáne aýyl sharýashylyǵy mamandyqtaryna bólinedi.

Baǵdarlama qatysýshylaryna memlekettik shákirtaqy tólenip, jataqhanadan oryn beriledi.

Konkýrsqa qatysý úshin talapker UBT tapsyryp, tańdaǵan bilim berý baǵdarlamasy boıynsha belgilengen shekti baldy jınaýy qajet.

Oqýǵa túskennen keıin grant alýǵa bola ma?

Talapker memlekettik grantty negizgi konkýrs kezinde utyp almasa da, keıinnen tegin oqýǵa múmkindik týýy múmkin. Eger memlekettik grant ıegerleriniń biri odan bas tartsa, bosaǵan grant konkýrstyń qorytyndysy boıynsha kelesi úmitkerge beriledi.

Sondaı-aq aqyly bólimge qabyldanǵan stýdentter keı jaǵdaıda bos qalǵan bilim grantyna aýysa alady.

Aıta keteıik, buǵan deıin, Qazaqstanda bilim granttary konkýrsyna qujat qabyldaý qashan bastalatyny týraly jazǵan edik.