Memlekettik-jekeshelik áriptestik jobalaryn iske asyrýǵa mıkroqarjy uıymdary tartylady
ASTANA. KAZINFORM — Nátıjesinde 2028 jyly negizgi kapıtalǵa salynǵan ınvestıtsııalardyń úlesi jalpy ishki ónimge 21 paıyzǵa deıin ulǵaıady.
Bul týraly Úkimet otyrysynda makroekonomıkalyq turaqtandyrý jáne halyqtyń ál-aýqatyn arttyrý jónindegi birlesken is-qımyl baǵdarlamasyn tanystyrǵan Premer-mınıstrdiń orynbasary — Ulttyq ekonomıka mınıstri Serik Jumanǵarın aıtty.
— Investıtsııalardyń ósýin yntalandyrý úshin jańa ınvestıtsııalyq tsıkldi iske qosý boıynsha júıeli sharalar qabyldanatyn bolady. Munda ınvestıtsııalaý protsesin jeńildetetin jáne jobalardy iske asyrýdyń barlyq kezeńinde ashyqtyqty qamtamasyz etetin ulttyq tsıfrlyq ınvestıtsııalyq platforma tartylady. «Investıtsııalarǵa tapsyrys» qaǵıdatyna negizdelgen jańa tásil engizilýde. Quny 29,5 mlrd teńgeden asatyn ınvestıtsııalyq jobalar úshin basym salalarda 25 jyl ishinde zańnamanyń turaqtylyǵyna kepildik beretin ınvestıtsııalar týraly kelisimder jasalady, — dedi ol.
Vıtse-premer sheteldik ınvestıtsııalardy tartý úshin «Astana» halyqaralyq qarjy ortalyǵynyń áleýeti de paıdalanylatynyn aıtty.
— Erekshe mańyzdy memlekettik-jekeshelik áriptestik jobalaryn ázirleýge jáne iske asyrýǵa mıkroqarjy uıymdary tartylatyn bolady. Nátıjesinde 2028 jyly negizgi kapıtalǵa salynǵan ınvestıtsııalardyń úlesi jalpy ishki ónimge 21 paıyzǵa deıin ulǵaıady, — dedi Serik Jumanǵarın.
Aıta keteıik, Mınıstrler kabınetiniń músheleri halyqtyń ál-aýqatyn arttyrý jónindegi birlesken is-qımyl baǵdarlamasyn talqyǵa salyp jatyr.
Budan buryn Úkimet uzaq merzimdi óndiristik qabilettilikti joǵarylatýǵa basymdyq beretinin jazǵan edik.