Memlekettik-jekeshelik áriptestik: eń belsendi alty óńir anyqtaldy

ASTANA. KAZINFORM — Qazaqstanda memlekettik-jekeshelik áriptestik (MJÁ) jobalary boıynsha qabyldanǵan memlekettik mindettemelerdiń jalpy kólemi 2 trln 662 mlrd teńgeni quraıdy. Bul týraly Ortalyq kommýnıkatsııalar qyzmetinde ótken brıfıngte qazaqstandyq MJÁ ortalyǵynyń basqarma tóraǵasy Aslan Qalıǵazın málimdedi.

Onyń sózinshe, qabyldanǵan qarajattyń shamamen 40%-y oryndalǵan.

— Aqmola jáne Batys Qazaqstan oblystarynda memlekettik mindettemeler tolyq kólemde oryndaldy. Almaty qalasy, sondaı-aq Shyǵys Qazaqstan, Qostanaı, Aqtóbe jáne Pavlodar oblystarynda tólemderdiń oryndalý deńgeıi 80%-dan asty. Aldaǵy úsh jylda qosymsha 763 mlrd teńge tólenedi dep josparlanyp otyr, — dedi Aslan Qalıǵazın.

Memlekettik-jekeshelik áriptestik jobalaryn iske asyrý tıimdiligin arttyrý maqsatynda jyl saıyn óńirlerdiń reıtıngi jarııalanady. Reıtıng engizilgennen keıin ákimdikter óz jobalaryna baqylaýdy kúsheıtip, qujattamany júıelep, ınvestıtsııa tartýǵa basymdyq bergen.

— 2025 jyldyń qorytyndysy boıynsha Pavlodar oblysy, Astana qalasy, Aqtóbe, Qyzylorda, Qostanaı jáne Jetisý oblystary kóshbasshylar qataryna endi. Bul óńirler ınvestıtsııany kóbirek tartyp, jobalardyń iske asyrylýyn muqııat qadaǵalaǵan. Al Mańǵystaý, Soltústik Qazaqstan, Jambyl jáne Aqmola oblystary reıtıngtiń tómengi satysynda tur, — dedi ol.

Buǵan deıin elimizde endigi ýaqytta memlekettik-jekemenshik áriptestik sharty tek konkýrstyq negizde jasalatyny týraly habarlaǵan edik.