Memlekettik uıymdar kıik eti ónimderin satyp alady
ASTANA. KAZINFORM – Elde kıik etin ótkizýdiń qandaı balama joldary qarastyrylyp jatyr? Bul suraqqa Ekologııa jáne tabıǵı resýrstar mınıstrliginiń Orman sharýashylyǵy jáne janýarlar dúnıesi komıteti jaýap berdi.
- Komıtet aqbóken etin qaıta óńdeý kólemin arttyrý maqsatynda kıiktiń buqtyrylǵan jáne basqa da et ónimderin Taýarlardyń, jumystardyń jáne kórsetiletin qyzmetterdiń biryńǵaı nomenklatýralyq anyqtamalyǵyna (Taýarlar, jumystar men kórsetiletin qyzmetter katalogy) engizý máselesin pysyqtady, - delingen Orman sharýashylyǵy jáne janýarlar dúnıesi komıtetiniń Kazinform agenttigine bergen jaýabynda.
Atap aıtqanda, buǵan deıin katalogqa tek bir pozıtsııa engizilgen bolatyn: 101315.910.000006 — konservilengen kıik eti.
Jumys nátıjesi boıynsha katalogqa qosymsha taǵy 4 pozıtsııa engizildi. Onyń qatarynda:
- kıik salqyndatylǵan jarty eti (101139.900.000006);
- kıiktiń salqyndatylǵan tutas eti (101139.900.000007);
- kıiktiń muzdatylǵan jarty eti (101139.900.000004);
- kıktiń muzdatylǵan tutas eti (101139.900.000005) bar.
- Budan bólek, 2026 jylǵy 4 tamyzda Qazaqstan Respýblıkasy Tótenshe jaǵdaılar mınıstrligi kıiktiń konservilengen etin memlekettiń materıaldyq rezervindegi materıaldyq qundylyqtaryn saqtaý normatıvterine qosý normasyn bekitti. Osylaısha, memlekettik uıymdar belgilengen tártippen kıik eti ónimderin satyp alýdy júzege asyra alady, - dep atalyp ótken vedomstvo aqparatynda.
Eske salsaq, Aýyl sharýashylyǵy mınıstrligi kıik etiniń baǵasyn usynylǵan mólsherden, ıaǵnı 1600 teńgeden túsirýdi qarastyryp jatqan joq.
Elimizde kıik etine degen suranys tómendegen. Osyǵan baılanysty Aýyl sharýashylyǵy mınıstrligi ony ótkizýdiń balama joldaryn qarastyryp jatyr. Sonyń biri — kıik etin memlekettik satyp alý aıasynda satyp alyp, kásiporyn qyzmetkerleriniń tamaqtaný ratsıonyna engizý.
Aıta keteıik, bıologııalyq negizdemege sáıkes, 2026 jyly 580 000 kıikti aýlaý usynyldy.
