Memlekettik ýnıversıtetterde oqý aqysy óse me – mınıstr jaýaby

ASTANA. KAZINFORM – Memlekettik ýnıversıtetterde oqý aqysy óspeıdi. Bul týraly Ǵylym jáne joǵary bilim mınıstri Saıasat Nurbek aıtty.

Búgin Parlament palatalarynyń birlesken otyrysynan keıin tilshiler «bıyl oqý aqysy óse me?» dep surady.

Óz kezeginde mınıstr memlekettik ýnıversıtetterde oqý quny byltyr jáne osy jyly bir deńgeıde ekenin aıtty.

- Memlekettik joǵary oqý oryndarynda (bıyl) bir deńgeıde ustap turmyz, - dedi S. Nurbek.

Onyń sózine qaraǵanda, jańa oqý jylyna 78 myńǵa jýyq grant bakalavrıatqa bólinedi. Al magıstratýra men doktorantýrany qosa eseptegende, 100 myń grantqa jaqyndaıdy.

- Jyl saıyn elimizde grant sanyn kóbeıtip jatyrmyz. Bul turǵyda ósip kele jatqan halyq sanyna oraı stýdentterdi qamtýǵa tyrysyp otyrmyz. Sonymen qatar, qosymsha tórt tetikti iske qosqanymyzdy bilesizder. «Ulttyq qor – balalarǵa» jobasy boıynsha balalardyń esep-shotyna qarjy aýdarylyp jatyr. «Keleshek» jınaq qory tolyqqandy iske qosyldy, - dedi vedomstvo basshysy.

Buǵan deıin sheteldikter nelikten Qazaqstannyń joǵary oqý oryndaryn tańdaıtynyn jazǵan edik.