Memlekettik turǵyn úı qorynan baspana berý qaǵıdalary bekitildi
ASTANA. KAZINFORM — Ónerkásip jáne qurylys mınıstri memlekettik turǵyn úı qorynan turǵyn úı berý qaǵıdalarynyń jańa redaktsııasyn bekitti.
2025 jylǵy 31 naýryzdaǵy buıryqqa sáıkes:
— Memlekettik mekemeler men memlekettik kásiporyndardyń turǵyn úı qorynan baspanaǵa muqtaj retinde esepke sol eldi mekende turatyn osy mekemeler men kásiporyndardyń qyzmetkerleri qoıylady, — delingen qujatta.
Eger memlekettik mekemeler men kásiporyndardyń turǵyn úı qorynda bos úı bolsa, ótinish bergen adamdarǵa baspana alý quqyǵy beriledi.
Esepke qoıý úshin ýákiletti organǵa kelesi qujattar qajet:
— Ótinish;
— Ótinish berýshi men onyń otbasy músheleriniń jeke basyn kýálandyratyn qujattarynyń kóshirmeleri;
— Nekege turý (buzý), otbasy músheleriniń qaıtys bolýy, balalardyń týýy týraly kýálikterdiń kóshirmeleri;
— Ótinish berýshiniń otbasyna ózge tulǵalardy qosý týraly sot sheshimi (bar bolsa);
— Ótinish berýshiniń (nemese otbasynyń) áleýmettik osal toptarǵa jatatynyn rastaıtyn qujat.
Ýákiletti organ ótinish berýshi men onyń otbasy músheleriniń menshiginde turǵyn úıdiń bar-joǵy týraly aqparatty memlekettik aqparattyq júıeler arqyly alady. Otbasy músheleriniń mekenjaıy týraly málimet te sol júıe arqyly anyqtalady. Osylaısha ótinish berý kezinde aqparattyq júıelerden alýǵa bolatyn qujattar men málimetter talap etilmeıdi.
Qujattar qaralǵannan keıin, ótinish berilgen kúnnen bastap 5 jumys kúninen keshiktirilmeı, ýákiletti organ kelesi eki sheshimniń birin qabyldaıdy:
— esepke qoıý týraly, kezek nómirin kórsete otyryp, habarlama jiberedi;
— negizdelgen jazbasha bas tartý jiberedi.
Memlekettik turǵyn úı qorynan baspana berý týraly sheshim turǵyn úı komıssııasynyń qorytyndysy negizinde qabyldanady. Eger komıssııa turǵyn úı berýdi maquldasa, onda 15 kún ishinde ótinish berýshimen memlekettik mekeme nemese kásiporyn arasynda turǵyn úıdi jalǵa alý týraly shart jasalady.
— Shart úsh dana etip rásimdeledi, bir danasy ýákiletti organda saqtalady, ekinshisi memlekettik múlik tizilimine tirkeý úshin jergilikti atqarýshy organǵa tapsyrylady jáne úshinshisi berýshige beriledi jáne qonystaný quqyǵyn rastaıtyn jalǵyz qujat, — delingen buıryq mátininde.
Jalǵa alýshylar (qosymsha jalǵa alýshylar) e-qazyna.kz veb-portaly arqyly óz sharttary, esepteýler, bıýdjetke tólemder jáne aıyppuldar týraly aqparatty kóre alady.
Buıryq 2025 jylǵy 24 mamyrdan bastap kúshine enedi.
Aıta ketsek, bıyl elimizde rekordtyq kólemde turǵyn úı paıdalanýǵa beriledi. Bul týraly Premer-mınıstrdiń orynbasary Serik Jumanǵarın Úkimet otyrysynda málimdegen edi.