Memlekettik týdy balkon men úıdiń qasbetine ilýge bola ma
ALMATY. KAZINFORM – Ál-Farabı atyndaǵy QazUÝ mamandary «Memlekettik týdy balkon men úı qasbetine ilýge bola ma?» degen suraqqa jaýap berdi. Sarapshylardyń aıtýynsha, zańnama memlekettik rámizderdi azamattardyń erkin qoldanýyna múmkindik beredi. Biraq ol mindetti túrde belgilengen talaptar men qurmet normalaryna saı bolýǵa tıis.
Ál-Farabı atyndaǵy QazUÝ-dyń memleket jáne quqyq teorııasy men tarıhy, konstıtýtsııalyq jáne ákimshilik quqyq kafedrasynyń professory, zań ǵylymdarynyń doktory Alýa Ibraevanyń aıtýynsha, qoldanystaǵy zańnama memlekettik rámizderdi qorǵaýǵa ǵana emes, olarǵa qurmetpen qaraý mádenıetin qalyptastyrýǵa da baǵyttalǵan.
Alýa Ibraeva memlekettik rámizderdiń Qazaqstan halqynyń ortaq ıgiligi ekenin aıtty. Kez kelgen azamat týdy elge qurmet kórsetip, patrıottyq sezimin bildirýge paıdalana alady. Memlekettik týdy turǵyn úıge, balkonǵa, ǵımarattyń qasbetine ilip, sporttyq, mádenı jáne qoǵamdyq is-shara kezinde zańnamada belgilengen talapty saqtaı otyryp qoldanýǵa ruqsat etilgen.
– Memlekettik rámizder memlekettik organdarǵa ǵana emes, búkil Qazaqstan halqyna tıesili. Azamattar zań talaptaryn saqtaı otyryp, Memlekettik týdy, Eltańba men Ánurandy patrıotızm men ulttyq maqtanyshtyń kórinisi retinde paıdalanýǵa quqyly, - dedi Alýa Ibraeva Almaty óńirlik kommýnıkatsııalar qyzmetinde ótken brıfıng kezinde.
Sonymen qatar sarapshylar memlekettik rámizderdi paıdalaný men qurmetteý qatar júrýge tıis ekenin aıtty. Zańnamaǵa sáıkes, memlekettik rámizderdi qorlaý, olardy mazaq etý, ádeıi burmalaý nemese memlekettiń qadir-qasıetin tómendetetin maqsatta qoldanýǵa tyıym salynady.
Brıfıng kezinde memlekettik rámizderdi tsıfrlyq keńistikte paıdalaný máselesine de erekshe nazar aýdaryldy. ál-Farabı atyndaǵy QazUÝ-dyń ǵylymı-ınnovatsııalyq jumys pen halyqaralyq baılanystar jónindegi dekan orynbasary, qaýymdastyrylǵan professor Ásel Sháripovanyń aıtýynsha, áleýmettik jelilerdiń qarqyndy damýy jaǵdaıynda paıdalanýshylardyń quqyqtyq saýattylyǵynyń mańyzy artyp otyr.
Onyń sózinshe, eń jıi kezdesetin quqyq buzýshylyqtardyń qatarynda memlekettik rámizderdi qurmetsiz mánmátinde fotomontaj jasaý arqyly jarııalaý, sondaı-aq olarǵa qorlaıtyn sıpattaǵy materıaldardy taratý bar.
– Tsıfrlyq dáýirde ınternet keńistiginde memlekettik rámizderdi paıdalanýǵa jaýapkershilikpen qaraýdyń mańyzy erekshe. Olardy qurmetsiz paıdalaný faktileriniń ózi memlekettik qundylyqtar men ınstıtýttarǵa degen teris kózqarastyń qalyptasýyna áser etýi múmkin, - dedi Ásel Sháripova.
Sonymen birge spıker mundaı jaǵdaılardy qarastyrý kezinde naqty mán-jaılar, sýretti paıdalaný maqsaty men memlekettik rámizderdi qorlaý nıetiniń bolǵan-bolmaǵany da eskeriletinin aıtty.
Aıta keteıik, 4 maýsymda elimizde Memlekettik rámizder kúni atalyp ótedi. Osydan 34 jyl buryn táýelsiz Qazaqstannyń óz Eltańbasy, Týy jáne Ánurany bekitildi.
Eske salaıyq, buǵan deıin Prezıdent Qasym-Jomart Toqaev Astanadaǵy «Atameken» etno-memorıal kesheninde Memlekettik tý kóterý rásimine qatysqanyn habarlaǵanbyz.
