Memlekettik tilde sóıleıtinimdi maqtan etemin – atyraýlyq tergeýshi ıÝlııa Kýznetsova

ATYRAÝ. KAZINFORM – Atyraý oblysynyń polıtsııasynda memlekettik tilde sóıleıtin, oıyn erkin jetkizetin ózge etnostyń ókili az emes. Sonyń biri – ıÝlııa Kýznetsova.

Qazir ol Atyraý qalalyq polıtsııa basqarmasy tergeý bóliminiń tergeýshisi bolyp jumys isteıdi. Sheni – polıtsııa aǵa leıtenanty. Kindik qany Reseı Federatsııasymen shekaradaǵy Qurmanǵazy aýdanynda tamǵan. Osyndaǵy Birlik aýylynda ornalasqan S.Imashev atyndaǵy orta mektepti bitirgen.

– Bala kezimnen qazaqsha sóıleýge ańsarym aýdy. Aýyldaǵy balalarmen qazaqsha áńgimelesip, olımpıadaǵa qatystym. Qazir memlekettik tilde erkin sóıleımin. Nege mundaı qadamǵa bardym? Birinshiden, memlekettik tilde sóıleý – Qazaqstan azamattarynyń mindeti. Ekinshiden, qazaq halqynyń tarıhy men salt-dástúrin, ádebıeti men mádenıetin jete bilýime jol ashty. Úshinshiden, zań men ádilettiliktiń ústemdigin qamtamasyz etetin mamandyqty tańdaǵandyqtan, memlekettik tildi erkin meńgerýdi paryzym sanadym. Qazaqsha sóılegenimdi maqtan etemin, - deıdi ıÝlııa Andreevna.

Mektep bitirer kezde tergeýshi bolýdy maqsat etken. Sóıtip, Іshki ister akademııasynyna oqýǵa túsken.

– Tergeýshi bolýdyń ózindik qıyndyǵy bar. Ásirese, osy mamandyqty tańdaǵan áıelderge ońaı emes. Óıtkeni, ár istiń astaryna tereń úńilip, kúdiktige taǵylǵan aıypty bultartpaıtyn dálel kerek. Sol sebepten, ár iske jaýapkershilikpen qaraımyn. Kúdiktilermen, jábirlenýshiler jáne kýágerlermen jıi kezdesip, olardyń jaýaptaryn zerdeleımin. Kúdiktiniń kinásin dáleldeýge sep bolatyn aıǵaq zattardy eki shuqyp, bir qaraımyn. Bir isti tergeýdi bitirýge jaqyndaǵanda, taǵy isti tergeýge týra keledi. Munyń bárine tózimdilik, kásibı sheberlik qajet, - deıdi ıÝlııa Kýznetsova.

Onyń aıtýyna qaraǵanda, tergeýge alǵan isti jeńil, ne aýyr dep bólmeý kerek. Óıtkeni ár istiń artynda adam taǵdyry bar.

– Kúndelikti jumysym kúdiktiden jaýap alýdan bastalady. Keıde oqıǵa ornyna qaıta barýǵa týra keledi. Qylmystyq isterdi zań aıasynda tergeý úshin kýágerlermen, jábirlenýshilermen sóılesemin. Tergeý júrgizý kezinde oryssha jetik sóıleı almaıtyndar kezdesedi. Sondaı sátte kúdiktilermen, jábirlenýshiler jáne kýágerlermen qazaqsha sóılesemin. Qazaqsha sóılegenim, olardyń ashyla sóıleýine jol ashady. Mine, memlekettik tildi jetik meńgergenimniń jemisin osylaı kórip júrmin, - deıdi tergeýshi.

Tergeýshiniń pikirinshe, qylmystyq isti sapaly tergeý úshin tyńdaı bilý kerek. Bul kúdiktiniń aıybyn zań aıasynda dáleldep, salmaqty sheshim qabyldaýǵa septigin tıgizedi.

– Osy mamandyqty tańdaǵan soń tózimdi bolýǵa tyrysamyn. Tergeýshiniń sheberligine qosa ishki mádenıeti de, rýhy da myqty bolýy qajet. Keıbir kúdiktiniń de, jábirlenýshiniń de kúızeliske túskenin baıqaımyn. Sondaı kezde zań aıasynda hattama toltyrýmen shektelmeı, qoldaý kórsetýdiń de mańyzy zor. Osyndaıda qazaq tiliniń jylýy men meıirimi erekshe ról atqarady, - deıdi ıÝlııa Kýznetsova.

Ol jumystan bos ýaqytyn mándi ótkizýge tyrysady. Sportpen shuǵyldanady. Án salǵandy, bılegendi jany súıedi.

– Tergeýshige bilimin, sheberligin udaıy jetildirý qajet. Aldaǵy maqsatym – Іshki ister akademııasynyń magıstratýrasynda, keıin doktorantýrasynda oqý. Jas tergeýshilerge tájirıbemdi bólisetindeı dáris oqyǵym keledi. Eń bastysy – jastardyń memlekettik tilde sóıleýine yqpal etsem deımin. Jastardyń qazaqsha sóıleýden uıalmaǵanyn, eldiń damýyna úles qosatyn belsendi, Otanyn súıetin patrıot bolǵanyn qalaımyn, - deıdi ol.

Eske sala ketelik, budan buryn sýdan tórt balany aman alyp shyqqan qostanaılyq nagradaǵa ıe bolǵany habarlanǵan edi.