Memlekettik tildi zań jobalaryn jazý tili retinde bekitý qajet — Bıbigúl Jeksenbaı

ASTANA. KAZINFORM — Zań jobalarynyń alǵashqy drafting tilin — memlekettik til retinde bekitý qajet. Bul týraly Parlamentarızm ınstıtýty uıymdastyrǵan dóńgelek ústel barysynda Senat depýtaty Bıbigúl Jeksenbaı aıtty.

— Memlekettik tildiń zań shyǵarý, bilim berý jáne tsıfrlyq keńistiktegi qoldanylýyn arttyrý — bul strategııalyq mindet. Bul baǵytta biz zańnamalyq negizdi jetildirýmen qatar, jańa tehnologııalardyń múmkindigin tolyq paıdalanýymyz qajet. Memlekettik tildiń zań shyǵarý protsesindegi úlesin arttyrý úshin eń aldymen quqyqtyq bazany jetildirý qajet. 2023-2029 jyldarǵa arnalǵan Til saıasatyn damytý tujyrymdamasynda zań jobalarynyń bastapqy nusqasyn memlekettik tilde ázirleý mindeti aıqyn kórsetilgen. Búgingi zertteýler kórsetkendeı, zań jobalarynyń 70 paıyzdan astamy bastapqyda orys tilinde daıyndalady. Bul tájirıbe aýdarmaǵa táýeldilikti arttyryp, mazmundyq dáldikke nuqsan keltiredi, — dedi senator.

Sondyqtan ol «Quqyqtyq aktiler týraly» zań men Parlament reglamentine tıisti ózgerister engizip, zań jobalarynyń alǵashqy drafting tilin — memlekettik til retinde bekitý qajettigin aıtady.

— Quqyqtyq termınderdiń turaqtylyǵy men dáldigi zań mátinderiniń sapasynyń negizgi kórsetkishi. Sondyqtan Termincom jáne Til Qazyna bekitken sózdikter men nusqaýlyqtar barlyq memlekettik organ úshin mindetti qoldanýǵa jatqyzylýy tıis. Ádilet mınıstrligi 2024 jyly quqyqtyq mátinderdiń sapasyn baǵalaý úshin quqyqtyq lıngvıstıka ádistemesin engizýdi josparlady. Bul — memlekettik tildiń zań shyǵarý sapasyn arttyrýdyń naqty tetigi, — dedi Bıbigúl Jeksenbaı.

Otyrysta Parlamentarızm ınstıtýty dırektorynyń orynbasary Lázzat Súleımenova memlekettik tildiń basymdyǵy zań júzinde bekitilgenimen tájirıbede qoldanylý deńgeıi áli de jetkiliksiz ekenin aıtqan edi.