Memlekettik til zańnamasyn jetildirý qajet – Qazybek Isa
ASTANA. KAZINFORM — Tilge qatysty kez kelgen qatań sheshim syrtqy kúshterge aqparattyq jáne saıası manıpýlıatsııa jasaýǵa daıyn argýment bolmaq. Bul týraly búgin Májilistiń jalpy otyrysynda jańa Konstıtýtsııa jobasyn talqylaý barysynda depýtat Qazybek Isa aıtty.
- Parlamentte memlekettik til týraly zań qabyldaý jaıly depýtattyq saýal jasaǵanymda bir aýyz qoldaý jasaı almaı, qaıta qazaq tiline qarsy shyqqandar qazir aıaq astynan til jaıly «aqyl» aıtqyshtarǵa aınalypty. Qazir Parlament 90 paıyz qazaqsha sóıleıdi, qudaıǵa shúkir. Ózge etnos ókilderi, áriptesterimiz de bizben jarysyp, memlekettik tilde sóılep otyr. 2024 jyly talaı kóterip júrip, Zańǵa «Qazaqstan azamattyǵyn alý úshin Memlekettik tilden emtıhan tapsyrý kerek» degen bapty engizdik. Bul elimizge syrttan emin-erkin eshkim kire bermeıdi degen sóz. Memlekettik qyzmetke turý úshin memlekettik tildi bilý kerek, test tapsyrylady. Osy testti qaıta qarap, tolyqtyrý qajet, - dedi depýtat.
Qazybek Isa Parlamentte Memlekettik til zańnamasyn jetildirýdi birneshe ret usynǵanyn eske saldy.
- Bul mańyzdy másele. Memlekettik til zańnamasyn jetildirý qajet ekenin taǵy da qaıtalap aıtamyn. Qazirgi geosaıası ahýaldyń kúrdeligi sondaı: til máselesi qaýipsizdik faktoryna aınaldy. Búgingi álemde ol ishki saıasattan shyǵyp, geosaıası qural men yqpal bolyp tur. Sondyqtan, ókinishke oraı tilge qatysty kez kelgen qatań sheshim syrtqy kúshterge aqparattyq jáne saıası manıpýlıatsııa jasaýǵa daıyn argýment bolmaq. Til máselesiniń baıyptylyǵy turaqtylyqty saqtaıtyn mehanızm qyzmetin atqaryp keledi. «Táýelsizdikti alý qandaı qıyn bolsa, táýelsizdikti saqtap qalý da sondaı qıyn» deıdi danyshpandar. Sondyqtan bul máselege biz baısaldy baıyppen, salmaqty sabyrmen qaraýymyz kerek. Qoryta aıtarymyz, memlekettik tilimiz ultymyzdy uıystyratyn mártebesi aıqyn tilge aınalýy qajet. Táýelsiz eldiń taǵdyry siz ben bizdiń qolymyzda. Jańa zaman talabyna saı jańa Konstıtýtsııa jobasyn qoldaımyz, - dedi Qazybek Isa.
Aıta keteıik, jańa Konstıtýtsııa jobasyn talqylaý barysynda depýtat Erkin Ábil «Uly dala» uǵymynyń Konstıtýtsııada kórinis tabýy – tarıhı sabaqtastyqty quqyqtyq deńgeıde bekitýdiń naqty dáleli ekenin aıtqan edi.