Memlekettik til saıasatyn iske asyrý jónindegi komıssııanyń otyrysy ótti
ASTANA. KAZINFORM – QR Premer-Mınıstriniń orynbasary Tamara Dúısenovanyń tóraǵalyǵymen Úkimet janyndaǵy Memlekettik til saıasatyn iske asyrý jónindegi komıssııanyń otyrysy ótti.
Vedomstvonyń baspasóz qyzmeti málim etkendeı, onyń jumysyna QR Parlamenti depýtattary, ortalyq memlekettik organdardyń basshylary, belgili qoǵam qaıratkerleri jáne ǵalymdar qatysty.
Komıssııa otyrysynda qazaq tiliniń memlekettik til retindegi damý máseleleri, til mádenıetin arttyrý jáne tildik kapıtaldy nyǵaıtýǵa baǵyttalǵan úılesimdi ári teńgerimdi til saıasatyn júrgizý máseleleri qarastyryldy.
Otyrys barysynda QR Ǵylym jáne joǵary bilim mınıstri Saıasat Nurbek Til saıasatyn damytýdyń 2023-2029 jyldarǵa arnalǵan tujyrymdamasynyń iske asyrylý barysy jáne Memleket basshysynyń tapsyrmasyna oraı memlekettik tilde jasandy ıntellektini qoldanysqa engizý, qazaq tilin ǵylym tili retinde damytý, tilge qatysty zamanaýı IT-jobalardy ázirleý baǵytynda atqarylǵan jumystar týraly baıandady.
Sondaı-aq QR Ádilet mınıstri Azamat Esqaraevtyń memlekettik tilde zań ázirleý máselesi, Halyqaralyq «Qazaq tili» qoǵamynyń qyzmeti týraly qoǵamdyq birlestiktiń prezıdenti Raýan Kenjehanulynyń baıandamalary tyńdaldy.
Otyrys qorytyndysy boıynsha komıssııanyń 2024 jylǵa arnalǵan jumys jospary bekitildi. QR Premer-Mınıstriniń orynbasary, Komıssııa tóraǵasy Tamara Dúısenova memlekettik til saıasatyn tıimdi iske asyrýǵa baǵyttalǵan birqatar naqty tapsyrma berdi.
