Qazaqstandyq telearnalar nelikten UFC týrnırlerin kórsetpeıdi
ALMATY. KAZINFORM - Byltyr 8 jeltoqsan kúni UFC 310 týrnırinde otandasymyz Shavkat Rahmonov baq synap, jeńiske jetti. Jarys kúni qazaqstandyq kórermender áleýmettik jelide UFC jekpe-jekteri barlyǵyna qoljetimdi memlekettik arnalarda, onyń ishinde Qazsport arnasynda kórsetilmegenine narazylyǵyn bildirdi. Osy oraıda, Kazinform agenttigi Mádenıet jáne aqparat mınıstrliginen memlekettik telearnalardaǵy translıatsııa máselesine baılanysty saýal joldady.
— UFC uıymynyń qamqorlyǵymen ótetin jekpe-jekterdiń (MMA) Qazaqstan aýmaǵyndaǵy translıatsııa quqyǵy «Setanta Sports» kompanııasyna tıesili. Aıta ketý kerek, UFC translıatsııa quqyǵyn birneshe maýsymǵa tender arqyly satady. Sonymen qatar uıym qazaqstandyq sportshylardyń qatysýymen ótetin jekpe-jekterdiń translıatsııa quqyǵyn bólek satpaıdy, - dep habarlady vedomstvodan.
Sondaı-aq Mádenıet jáne aqparat mınıstrliginiń jaýabyna sáıkes, otandyq Qazsport telearnasy qalyptasqan jaǵdaıdy sheshý jolyn izdep, Rahmonovtyń jekpe-jegin memlekettik telearna efırinde kórsetý týraly quqyq ıesine usynys jasaǵan. Alaıda «Setanta Sports» bul jekpe-jekti tek óziniń qazaqstandyq kabeldik telearnasynda, sonymen qatar qosymshasy arqyly kórsetýge nıet bildirdi.
Sport jýrnalısi ári Youtube jelisindegi tanymal sporttyq arnanyń júrgizýshisi Petr Volıkov qazirgi ýaqytta qazaq sportshylarynyń jekpe-jekterin kórý úshin translıatsııa izdeıtin qazaqstandyqtardyń áli de bar ekenin aıtty.
— Memlekettik telearnalarda UFC týrnırlerin kórsetý mańyzdy. Sebebi kórermender Shavkat, Asý, Bekzat, Maqsum jáne ózge de jerlesterimizdiń jekpe-jekterine translıatsııa tappaı qınalǵandary týraly jıi aıtady. 1 jyl buryn jarys kúni, mysaly Shavkat shyǵatyn kezde translıatsııaǵa silteme suraıtyndar óte kóp edi. Setanta Sports telearnasy UFC týrnırlerine kórsete bastaǵaly, jekpe-jekti qaıdan kórýge bolatynyn suraıtyn adamdar azaıdy. Biraq múldem joq emes, ondaı adamdar áli de bar. Eger Qazsport telearnasy kórsetkende bul jeńilirek bolar edi, - deıdi sport sarapshysy.
Petr Volıkov UFC uıymynyń jekpe-jekteri men jalpy MMA sportyna qazaqstandyq kórermenderdiń qyzyǵýshylyǵy ne sebepti artqanyna toqtaldy.
— Menińshe, aralas jekpe-jekke degen qyzyǵýshylyq keshe ǵana paıda bolǵan joq, ol buryn da boldy. Mysaly, kásibı sportshylar men MMA jankúıerleriniń kóbisi aralas jekpe-jekti Pride uıymynyń zamanynan kóre bastaǵanyn aıtady. UFC paıda bolǵannan keıin nazar sonda qaraı aýysty. Qazir jankúıerler qatary kóbeıip keledi. Bul Shavkat jáne ózge de sportshylarymyzdyń UFC-degi jeńisterine baılanysty bolyp otyr, - deıdi ol.
Eske salaıyq, búginde UFC uıymynda 6 qazaqstandyq faıter bar. Olar: Shavkat Rahmonov, Asý Almabaev, Bekzat Almahan, Azat Maqsum, Nıkolaı Veretennıkov jáne Dııar Nurǵoja. Budan bólek álemdik promoýshnde Jalǵas Jumaǵulov, Sergeı Morozov jáne Marııa Agapova buryn óner kórsetti. Odan bólek reseılik qandasymyz Damır Ysmaǵulov ta UFC-de Qazaqstan týymen shyqty.
Aıta keteıik, 6 otandasymyzdyń ishinde ekeýi UFC reıtıngine kiredi. Rahmonov keıingi jekpe-jeginde Ien Gerrıdi jeńgennen keıin jartylaı orta salmaqta 2-orynǵa kóterildi.
Al byltyr qazan aıynda UFC Fight Night 245 týrnırinde brazııalııalyq Mateýs Nıkolaýdy jeńgen Asý Almabaev eń jeńil salmaqtaǵy sportshylar tiziminde 7-orynǵa kóterilip, keıin 8-orynǵa tústi.
Endi 1 naýryz kúni ótetin UFC Vegas 103 týrnırinde Asý Almabaev aýstralııalyq Stıv Ertsegpen kezdesedi.
Al Shavkat Rahmonov 2025 jyldyń ishinde jartylaı orta salmaqtaǵy UFC chempıony Belal Muhammadpen jekpe-jek ótkizedi dep josparlanǵan.