Memlekettik tapsyrmalardan básekelestik naryqtaǵy qyzmetter alynyp tastalýy kerek
ASTANA. KAZINFORM — Memlekettik tapsyrmalardyń qunyn esepteýdiń biryńǵaı talaptaryn belgileý qajet. Bul týraly Parlament palatalarynyń birlesken otyrysynda Joǵary aýdıtorlyq palata tóraǵasy Álıhan Smaıylov aıtty.
— Nátıjege qol jetkizýge baılanysty emes shyǵystardy kirgizbeı, memlekettik tapsyrmalardyń qunyn esepteýdiń biryńǵaı talaptaryn belgileý qajet. Memlekettik tapsyrmalar quramynan básekelestik naryqtaǵy bar qyzmetter nemese qosalqy merdigerlikke beriletin tapsyrystar alynyp tastalýy kerek, — dedi ol.
Aýdıtorlyq palata tóraǵasy bıýdjet júıesinen tys júretin qarjy aǵyndarynyń ashyqtyǵy mańyzdy másele bolyp otyrǵanyna nazar aýdartty.
— Jyldyq esepte bıýdjetten tys qorlarǵa qatysty málimetter tolyqqandy qamtylýy tıis. Bul olardyń turaqtylyǵy týraly qorytyndy jasaýǵa, kiristerdiń tolyqtyǵyn, shyǵystardyń aıqyndyǵyn baǵalaýǵa múmkindik berýi qajet. Jyldyq esepte kvazımemlekettik sektordyń qol jetkizgen nátıjeleri, olardyń qaryz alý maqsattary, memlekettik qoldaýdyń kólemi men áserleri týraly málimetterdi kórsetý mańyzdy. Olardy baǵalaýdyń basty krıterııi azamattardyń ál-aýqatyn arttyrý jáne ekonomıkalyq ósý bolýy tıis, — dedi Álıhan Smaıylov.
Onyń aıtýynsha, Joǵary aýdıtorlyq palata 2025 jylǵy respýblıkalyq bıýdjettiń atqarylýyna qatysty barlyq júıeli problema boıynsha 26 negizgi usynys ázirlegen.
— Olar aldaǵy kezeńde zańnamada kórinis tabady dep senemiz. Usynylǵan sharalar memlekettik resýrstardy paıdalaný jáne tutastaı alǵanda memlekettik basqarý tıimdiligin arttyrýǵa múmkindik beredi, — dedi ol.
Aıta keteıik, jalpy otyrysta Májilis pen Senat depýtattary Úkimettiń jáne Joǵary aýdıtorlyq palatanyń 2025 jylǵy respýblıkalyq bıýdjettiń atqarylýy týraly esepterin qarap jatyr.
