Memlekettik sýbsıdııalardy jymqyrǵan kúdikti Grýzııadan ekstradıtsııalandy
ASTANA. KAZINFORM — Qazaqstan Respýblıkasy Bas prokýratýrasynyń, Qarjylyq monıtorıng agenttiginiń jáne Іshki ister mınıstrligi Interpolynyń qyzmetkerleri Grýzııadaǵy Qazaqstan Elshiliginiń qoldaýymen atalǵan elden birneshe ret asa iri mólsherde alaıaqtyq jasaǵany úshin qylmystyq jaýapkershilikke tartý maqsatynda Qazaqstan azamatshasyn ekstradıtsııalady.
Tergeý nusqasy boıynsha kúdikti 2020–2023 jyldar aralyǵynda aýyl sharýashylyǵy taýaryn óndirýshilerdi memlekettik qoldaýǵa bólingen bıýdjet qarajatyn jymqyrýdyń qylmystyq shemasyn uıymdastyrǵan.
— Qylmystyq pıǵylyn iske asyrý maqsatynda ol senimdi tulǵalardyń atyna tirkelgen sharýa qojalyqtaryn, asyl tuqymdy iri qara maldy satyp alý týraly jalǵan sharttardy jáne ózge de jalǵan qujattardy paıdalanyp, solardyń negizinde jeńildetilgen kredıtter men memlekettik sýbsıdııalardy zańsyz alǵan. Qylmystyq áreketterdiń saldarynan memleketke jáne basqa da jábirlenýshilerge jalpy somasy 238 mıllıon teńgeden astam zalal keltirilgen, — delingen habarlamada.
Qylmys jasaǵannan keıin kúdikti qylmystyq qýdalaý organdarynan boı tasalap, halyqaralyq izdeýge jarııalanǵan.
Osy jyldyń naýryz aıynda ol Grýzııa aýmaǵynda ustalyp, Qazaqstan Respýblıkasy Bas prokýratýrasynyń suraýy boıynsha Qazaqstanǵa ekstradıtsııalandy. Qazirgi ýaqytta kúdikti tergeý ızolıatoryna qamaldy. Oǵan taǵylǵan qylmystar úshin múlki tárkilenip, 10 jylǵa deıin bas bostandyǵynan aıyrý jazasy kózdelgen.
Aıta keteıik, jyl basynan beri Grýzııadan jeti adam ekstradıtsııalandy, olardyń beseýi jymqyrǵany úshin izdeýde bolǵan.
Eske salaıyq, buǵan deıin The Finiko qarjy pıramıdasynyń qurylymdyq bólimshesin basqarǵan kúdikti Túrkııadan Qazaqstanǵa ekstradıtsııalanǵanyn habarlaǵan edik.
