Memlekettik shekara beldeýindegi 3 myńnan asa telim jekeniń qolynda — Depýtat saýaly
ASTANA. KAZINFORM — Senator Amangeldi Nuǵmanov shekaradaǵy kontrabanda týraly depýtattyq saýal joldady.
Depýtattyń aıtýynsha, qoldanystaǵy zańnama boıynsha shekara beldeýinde jatqan jer telimderin jeke menshikke jáne ýaqytsha jer retinde paıdalanýǵa berýge tyıym salynǵan. Alaıda, is júzinde osy sanatqa jatatyn úsh myńnan astam ýchaske jeke jáne zańdy tulǵalardyń menshiginde qalyp otyr. Senator bul telimderdiń bári memleketke qaıtarylýǵa tıis degen ustanymyn aıtty. Óıtkeni memlekettik shekaranyń jekelegen bólikterinde beldeý eniniń jetispeýi qosymsha qaýip týdyryp otyr.
—Jambyl jáne Túrkistan oblystaryndaǵy Qyrǵyz Respýblıkasymen, Ózbekstan Respýblıkasymen aradaǵy shekarada beldeýdiń eni keı jerlerde 30 metrden aspaıdy. Bul quqyq buzýshylarǵa ony sanaýly mınýttarda basyp ótýge múmkindik beredi. Mundaı aýmaqtar taýarlar men aýyl sharýashylyǵy janýarlarynyń kontrabandasy úshin paıdalanylady. Sondyqtan shekara beldeýiniń enin 1000 metrge deıin ulǵaıtý jáne tolyqqandy shekaralyq ınfraqurylymdy ornalastyrý úshin jaǵdaı jasaý qajet, — dedi Amangeldi Nuǵmanov.
Senator memlekettik shekaranyń jekelegen ýchaskelerinde beldeý enin ulǵaıtý máselesin Úkimet deńgeıinde qarastyryp, jer zańnamasyna engizilýi múmkin ózgeristerge keshendi quqyqtyq jáne áleýmettik-ekonomıkalyq baǵa berýdi usyndy.
Buǵan deıin Májilis qazaq-qyrǵyz shekarasyndaǵy ótkizý pýnkteri týraly kelisimge ózgeris engizgenin jazǵan bolatynbyz.