Artyq shyǵyndardy azaıtý úshin memlekettik satyp alý erejeleri ózgertildi

ASTANA. KAZINFORM — Joǵary aýdıtorlyq palatanyń usynymdary negizinde memlekettik satyp alýǵa ózgerister engizildi. Olar bıýdjet shyǵystarynyń tıimdiligin arttyrýǵa baǵyttalǵan.

QR Joǵary aýdıtorlyq palatasy baspasóz qyzmeti atap ótkendeı, memlekettik resýrstardy paıdalaný tıimdiligine jasalǵan aýdıtter zańnamadaǵy birqatar júıeli kemshilikti anyqtady. Bul kemshilikter keıbir jetkizýshilerge óz mindettemelerin tolyq oryndamaýǵa múmkindik berip kelgen.

Atap aıtqanda, jetkizýshiler jobalaý-smetalyq qujattamany ózgertý arqyly qosymsha qarjy suraý múmkindigine ıe bolǵan. Osyǵan baılanysty Úkimetke memlekettik satyp alý zańnamasyna ózgerister engizý usynyldy.

Sondaı-aq jetkizýshilerdi tańdaý kezinde qoldanylatyn baǵa jeńildigin esepteý tártibin naqtylaý qajet boldy. Osy usynystar negizinde Qarjy mınıstrligi memlekettik satyp alý qaǵıdalaryna tıisti túzetýler engizdi.

— Jańa normaǵa sáıkes, eger kelisimshartqa engizilgen ózgerister jobalyq-smetalyq qujattamany túzetýge baılanysty bolyp, kelisimshart somasyn ulǵaıtsa, onda bul ulǵaıtý konkýrs kezinde eseptelgen eń tómengi dempıng shegin eskere otyryp júrgiziledi, — delingen habarlamada.

Bul ózgeris:

• memlekettik kelisimshart somalaryn ósirý kezinde baǵa sharttaryn ádil esepteýge kómektesedi;

• bıýdjet shyǵyndaryn ońtaılandyrýǵa yqpal etedi.

Budan buryn Aýdıtorlyq palata talaptaryn oryndamaǵan 18 sheneýnik jazaǵa tartylǵany anyqtaldy.