Memlekettik satyp alýdaǵy jasandy bólshekteýge avtomatty tosqaýyl qoıyldy
ASTANA.KAZINFORM — Satyp alýdy jasandy túrde bólshekteýge jáne básekelestik rásimderden aınalyp ótýge qarsy kúresti kúsheıtý maqsatynda memlekettik satyp alý portaly jańǵyrtyldy. Bul týraly Joǵary aýdıtorlyq palata málim etti.
Joǵary aýdıtorlyq palata 2025 jylǵy shildede joǵary jetistikter sportyn da qamtyǵan sportshylardy tárbıeleý men daıarlaýǵa bólingen bıýdjet qarajatynyń paıdalanylý tıimdiligine aýdıt júrgizdi. Aýdıt qorytyndysy boıynsha Qarjy mınıstrligine memlekettik satyp alý portalynyń fýnktsıonalyn ońtaılandyrý tapsyryldy. Júıe elektrondyq dúken arqyly birtekti taýarlardy zańda belgilengen shekten asatyn somaǵa satyp alýdy ornalastyrýdy avtomatty túrde buǵattaıtyn bolady.
— Bul jerde satyp alýdy bólshekteýge qarsy is-qımyl týraly másele qozǵalyp otyr. Mundaı jaǵdaıda biryńǵaı qajettilik birneshe shaǵyn satyp alýǵa ádeıi bólinedi, olardyń árqaısyna shekti mán belgilenip, básekelestik rásim ótkizýdi talap etpeıtin bolady. Atalǵan is-qımyl nátıjesinde baǵa naryqtyq tetikter arqyly qalyptaspaıdy, kólem esebinen únemdeý múmkindigi joǵalady, ónim berýshiler toby azaıyp, operatsııalardyń ózi tizilim boıynsha bólshektenedi de, ashyqtyǵy tómendeı túsedi, — delingen habarlamada.
Sport salasynda atalǵan ádis óte ózekti, óıtkeni ártúrli ónim berýshilerden ártúrli partııalarmen satyp alynǵan sport qural-jabdyqtary men ekıpırovkanyń sapasy, sıpattamalary ózgeshe bolýy múmkin. Al kepildik mindettemeler ózara baılanysy joq birneshe shartqa bólinedi.
Alaıda avtomatty túrde buǵattaý tetigin iske qosý úshin taýarlardyń birtektiligin anyqtaıtyn biryńǵaı tetik qajet boldy. Formaldy belgi bolmaǵan jaǵdaıda júıe bir taýardy qaıta satyp alýdy obektıvti túrde erekshelenetin ártúrli pozıtsııalardy satyp alýdan ajyrata almaıtyn edi. Bul mindet 2026 jylǵy 1 qańtardan bastap Taýarlardyń, jumystar men kórsetiletin qyzmetterdiń jalpy jikteýishin (TJKQJJ) engizý arqyly sheshildi. Saýda jáne ıntegratsııa mınıstrligi ony tehnıkalyq-ekonomıkalyq aqparattyń ulttyq jikteýishi retinde qoldanysqa engizdi.
TJKQJJ taýarlardyń, jumystar men kórsetiletin qyzmetterdiń sıpattamalaryn birizdendiredi, satyp alý derekteriniń salystyrmaly bolýyn qamtamasyz etedi, qaıtalaný, satyp alýdy qate jikteý jáne tehnıkalyq erekshelikterde artyq talaptardyń bolý táýekelderin tómendetedi. Bul memlekettik satyp alýǵa da, kvazımemlekettik satyp alýǵa da qatysty. Osylaısha, jikteýish taýardyń birtektiligin anyqtaý úshin obektıvti negiz beredi.
Sonymen qatar 2026 jylǵy 1 qańtardan bastap memlekettik satyp alý veb-portalyna TJKQJJ boıynsha qosymsha jol engizildi. Qarjy mınıstriniń buıryǵymen jikteýish memlekettik satyp alýdy júzege asyrý kezinde qoldanylatyn anyqtamalyqtardyń biri retinde belgilendi, al 2026 jylǵy 17 tamyzdan bastap bul joldy toltyrý mindetti boldy.
Qazirgi ýaqytta elektrondyq dúken arqyly birtekti taýarlardy belgilengen ruqsat etilgen shekten asatyn kólemde satyp alýdy ornalastyrýdy avtomatty túrde buǵattaý TJKQJJ arqyly qamtamasyz etiledi.
Osylaısha, Joǵary aýdıtorlyq palatanyń tapsyrmasy tolyq kólemde oryndaldy, al memlekettik satyp alý júıesinde satyp alýdy jasandy túrde bólshekteýge qarsy kiriktirilgen tosqaýyl paıda boldy.
Aıta keteıik, buǵan deıin Qazaqstan Joǵary aýdıtorlyq palatasynyń memlekettik aýdıti joǵary jetistikter sporty, sport rezervin daıarlaý jáne bıýdjet qarajatyn paıdalaný salasynda birqatar júıeli kemshilikti anyqtaǵan bolatyn.
