Memlekettik satyp alýda alaıaqtyq shemalarǵa qalaı tosqaýyl qoıylady
ASTANA. KAZINFORM – Qarjy vıtse-mınıstri Daýren Keńbeıl memlekettik salý salasynda zańsyz áreketterge jol bermeýdiń tetikterine qatysty túsinik berdi.
Búgin Ortalyq kommýnıkatsııalar qyzmetindegi baspasóz máslıhatynda tilshiler memlekettik satyp alý salasyndaǵy alaıaqtyq áreketter jóninde, sondaı-aq Shymkenttegi ýnıversıtette múlikti satyp alý kezindegi baǵany joǵary kórsetý jaǵdaıy boıynsha suraq qoıdy.
- Memlekettik satyp alýlar salasynda túrli shemalar men aferalar boldy jáne áli de bar. Óıtkeni memlekettik kelisimsharttardy qandaı jolmen bolsa da utyp alǵysy keletin qyzmetine adal emes qatysýshylar kezdesedi, — dedi vıtse-mınıstr.
Spıkerdiń sózinshe, mundaı jaǵdaılardyń aldyn alý úshin konkýrsqa qatysýshylarǵa qoıylatyn talaptar kúsheıtilgen. Osy oraıda qarjylyq turaqtylyq, salyq tóleý kórsetkishteri, jumys tájirıbesi, sondaı-aq basqa da negizgi baǵyttar tekseriledi.
Sonymen qatar Daýren Keńbeıl Shymkent qalasyndaǵy ýnıversıtetterdiń birinde oryn alǵan faktige toqtala kele, bul jaǵdaı memlekettik satyp alýlar júıesine tikeleı qatysy joq ekenin aıtty.
- Bizde satyp alýlardyń birneshe túri bar, ıaǵnı memlekettik satyp alýlar, kvazımemlekettik satyp alýlar jáne jer qoınaýyn paıdalanýshylardyń satyp alýlary sııaqty baǵyttar qamtylady. Bizde memlekettik aýdıt organdary bar, olar táýekelderdi basqarý júıesi arqyly konkýrstyq qujattardy tekseredi. Máselen, memlekettik satyp alýlarǵa aýrahanalar men mektepter qatysyp, naqty bir oryndyqtyń túrin satyp alýǵa tapsyrys berýi múmkin. Osy jaǵdaıda onyń quny negizsiz tym joǵary bolsa, bul jaǵdaı táýekelderdi basqarý júıesinde anyqtalady. Budan keıin memlekettik aýdıttiń mamandary tapsyrys berýshige eskertý jasap, baǵany qaıta qaraý jóninde nusqaý beredi, - dep túsindirdi vıtse-mınıstr.
Onyń aıtýynsha, jaqyn arada memlekettik satyp alýlar salasyndaǵy barlyq protsess tolyq avtomattandyrylmaq.
«Tıisti tetikter iske qosylǵannan keıin, kúmándi joǵary baǵalar avtomatty túrde anyqtalyp, mundaı satyp alýlarǵa jol berilmeıdi», — dedi Daýren Keńbeıl.
Eske salsaq, jaqynda QMA Shymkent qalasy boıynsha departamenti M.Áýezov atyndaǵy Ońtústik Qazaqstan ýnıversıtetinde bıýdjet qarajatyn jymqyrý deregi boıynsha tergeýdi aıaqtady.
Vedomstvo málimetinshe, kúdiktiler qatarynda burynǵy birinshi prorektor, qarjy jáne ákimshilik departamentterdiń dırektorlary, óndiristik-tehnıkalyq bólimniń qoıma meńgerýshisi, sondaı-aq merdiger uıymdardyń basshylary bar. Kúdiktiler taýarlar is júzinde jetkizilmegen nemese jasandy túrde qymbat baǵamen satyp alynǵan, jalǵan memlekettik satyp alý sharttaryn jasasqan. Mysaly, osy shema aıasynda ýnıversıtet basshylyǵy naryqtyq quny 200 myń teńgeden aspaıtyn bir kreslony 20 mln teńgege satyp alǵan.
Avtor: Arýjan Jánádil