Memlekettik satyp alý júıesiniń tıimdiligi halyqaralyq deńgeıde baǵalanady
ASTANA. KAZINFORM — Qazaqstan halyqaralyq standarttarǵa sáıkes memlekettik satyp alý júıesin keshendi baǵalaýdy bastady, dep habarlaıdy Qarjy mınıstrliginiń baspasóz qyzmeti.
2026 jylǵy 9 shildede Qazaqstan Respýblıkasynyń Qarjy mınıstrligi Eýrazııalyq turaqtandyrý jáne damý qorymen (ETDQ) birlesip, MAPS (Methodology for Assessing Procurement Systems) halyqaralyq ádisnamasyna sáıkes Qazaqstan Respýblıkasynyń memlekettik satyp alý júıesin baǵalaýǵa arnalǵan kirispe semınaryn ótkizdi.
Semınarǵa memlekettik organdardyń ókilderi, halyqaralyq sarapshylar, sondaı-aq múddeli uıymdardyń ókilderi qatysty.
MAPS ádisnamasy boıynsha Qazaqstan Respýblıkasynyń memlekettik satyp alý júıesin aldyńǵy baǵalaýdy halyqaralyq qarjy ınstıtýttary (Dúnıejúzilik bank, EYDU, EQDB, IDB, ADB) 2019 jyly ótkizdi.
Іs-shara barysynda MAPS ádisnamasy sheńberinde qoldanylatyn baǵalaý júrgizýdiń maqsattary, kezeńderi men negizgi tásilderi túsindirildi.
— Baǵalaý júrgizý memlekettik satyp alýdyń qoldanystaǵy júıesin jan-jaqty taldaýǵa, halyqaralyq standarttar men úzdik álemdik tájirıbelerdi eskere otyryp, ony odan ári jetildirý baǵyttaryn aıqyndaýǵa múmkindik beredi, — deıdi mamandar.
Qarjy mınıstrligi memlekettik satyp alýdyń ashyq, tıimdi jáne avtomattandyrylǵan júıesin damytý jónindegi júıeli jumysty jalǵastyrady.
Buǵan deıin Qarjy mınıstrligi bızneske arnalǵan jańa onlaın servısti iske qosqanyn jazdyq.
