Memlekettik satyp alý týraly sharttardyń oryndalýy qoǵamdyq baqylaýǵa alynady
ASTANA. KAZINFORM - Májilis jańa redaktsııadaǵy «Memlekettik satyp alý týraly» zań jobasyn birinshi oqylymda maquldady. Joba men oǵan ilespe túzetýler Memleket basshysynyń memlekettik satyp alýdyń sapaly jańa júıesin qurý jónindegi tapsyrmasyn oryndaý maqsatymen ázirlendi.
Zań jobasyna sáıkes ásirese qurylysqa baılanysty jumystarǵa qoǵamdyq monıtorıng ınstıtýty engiziledi.
Memlekettik satyp alý (goszakup.gov.kz) veb-portalyna jumystardy oryndaý kestelerin, sharttardyń oryndalýy boıynsha esepterdi (onyń ishinde foto jáne beıne jazba) jalpy qoljetimdi etip jarııalaý usynylady. Qoǵamdyq baqylaý sýbektileri memlekettik satyp alý týraly sharttardyń oryndalýyn baqylaýǵa quqyly bolady.
Monıtorıng «Qoǵamdyq baqylaý týraly» zańda kózdelgen tetikterge sáıkes júrgiziledi. Norma ashyqtyqty arttyryp, sybaılas jemqorlyq táýekelderin tómendetýge baǵyttalǵan.
Memlekettik satyp alý týraly jańa zań jobasy protsesti ońaılatýǵa jáne bıýrokratııadan aryltýǵa baǵyttalǵan.
Osy saladaǵy máselelerdiń biri – rásimderdiń uzaqtyǵy. Osyǵan baılanysty aldyn ala qabyldaý kezeńin alyp tastaý, sondaı-aq jeke rásimderdi ótkizý merzimderin qaıta qaraý usynylady. Nátıjesinde memlekettik satyp alý rásiminiń jalpy uzaqtyǵy 2 aıdan 1 aıǵa deıin qysqarady.
Konkýrsqa qatysýǵa bir ótinim usynylǵan jáne ony biliktilik talaptaryna sáıkes dep tanyǵan jaǵdaıda, mundaı satyp alý ótkizildi dep sanalady.
- Sondaı-aq bir kózden satyp alýdy jetildirý boıynsha jumys jalǵasady. Aýyl ákimdikterine taýarlardy, jumystar men qyzmetterdi konkýrs ótkizbeı 3000 AEK-ke deıin satyp alý usynylyp otyrǵanyn atap ótti. Jumys toby bul shekti arttyrýdy qarastyryp jatyr, - dedi jumys tobynyń jetekshisi Rýslan Qojasbaev.
Sonymen qatar áleýetti jetkizýshilerdiń reıtıngin engizý usynylady.
- Oń dınamıka kórsetken rásimderdi avtomattandyrý elementteriniń biri - memlekettik satyp alýdyń reıtıngtik-baldyq júıesi. Satyp alýdyń jeńimpazyn portal memlekettik organdardyń aqparattyq júıeleriniń qarjylyq turaqtylyq, áleýetti jetkizýshilerdiń tájirıbesi jáne basqa da derekteri negizinde avtomatty túrde anyqtaıdy, - dedi Rýslan Qojasbaev.
Jańa redaktsııada shaǵyn jáne orta bıznes sýbektileri arasynda júzege asyrylatyn jumystardyń, qyzmetterdiń, taýarlar men satyp alýlardyń tizbesin engizý usynylady. Osyǵan oraı jumys júrgizilip jatqan aýdanda tirkelgen ónim berýshilerge 1 paıyzdyq shartty jeńildik qarastyrylǵan.
Óz kezeginde Erlan Qoshanov memlekettik satyp alý júıesin qaıta qaraý máselesi birneshe jyldan beri kóterilip kele jatqanyn atap ótti. Ol memlekettik satyp alý barlyq áleýmettik mańyzdy jobany júzege asyrýǵa tikeleı áser etetindikten Memleket basshysy bul salany túbegeıli reformalaýdy tapsyrǵanyn eske saldy.
– Bul zań jergilikti jerlerde týyndaıtyn túıtkildi máselelerdiń sheshilýine oń yqpal etedi dep senemiz. Kóp jumys atqaryldy. Endi zań jobasyn tezirek pysyqtap, ekinshi oqylymǵa shyǵarý kerek. Óıtkeni ony halyq kútip otyr. Óńirlerdegi bıznes qoǵamdastyǵy men turǵyndar usynylǵan ózgerister týraly óz pikirlerin bildirýi mańyzdy. Sondyqtan beıindi komıtet óńirlerge baryp, kóshpeli otyrys ótkizgeni jón, – dedi palata spıkeri.
Kásipkerlerdiń, ortalyq jáne jergilikti memlekettik organdardyń, qoǵam ókilderiniń qatysýymen Májilistegi jumys tobynyń aıasynda zań jobasyn ázirleý jumystary jalǵasady.
Osyǵan deıin Májilis «Memlekettik satyp alý týraly» zań jobasyn birinshi oqylymda maquldaǵanyn jazdyq.
