Memlekettik satyp alý portaly bir jylda 4,6 mlrd teńge tapqan
ASTANA. KAZINFORM – Memlekettik satyp alý portalyn qoldanýshylar bir jylda 4,6 mlrd teńge aqy tólegen. Qarjy vıtse-mınıstri Dáýren Keńbeıil osy qarajattyń qaıda jumsalǵanyn aıtty.
Ortalyq kommýnıkatsııalar qyzmetinde ótken baspasóz máslıhatynda BAQ ókili Memlekettik satyp alý portalyn ustaýǵa bıýdjetten qansha qarajat jumsalatynyn surady.
«Memlekettik satyp alý portaly aqyly ekenin bilesizder. Ondaǵy tarıfter ár túrli, satyp alý somasyna baılanysty aqy alynady. Bul aqydan túsken aqsha tolyq kólemde osy portaldy kútip ustaýǵa jáne qyzmetin qoldaýǵa baǵyttalady. 2023 jyldyń qorytyndysy boıynsha 4,6 mlrd teńgege jýyq qarjy jınaldy. Ol aqshanyń bári portaldy ustaýǵa baǵyttalady. Portaldy ustaýdan artylǵan jaǵdaıda respýblıkalyq bıýdjetke dıvıdent retinde joldanady», - dedi vıtse-mınıstr.
Onyń sózinshe, atalmysh portal 2022 jyly aqparattyń ashyqtyǵy jóninen 109 eldiń ishinde úshinshi oryn alǵan.
