Memlekettik satyp alý: Pavlodarda prokýrorlar 368 mln teńgelik artyq shyǵynnyń aldyn aldy
ASTANA. KAZINFORM — Pavlodar qalasynyń prokýratýrasy memlekettik satyp alýlarǵa júrgizilgen taldaý barysynda Ortalyq skverdi jóndeýdi josparlaý kezinde zań buzýshylyqtardy anyqtady. Bul týraly Bas prokýratýra málim etti.
Anyqtalǵandaı, Ortalyq skverdi jóndeýdi josparlaý barysynda smetalyq qujattamaǵa kólemi 25 myń sharshy metrden asatyn trotýar plıtalaryn tóseý jumystary, sondaı-aq quny 368 mln teńgeden asatyn dál osyndaı kólemdegi beton plıtalaryn satyp alý engizilgen.
— Bul rette skverdiń jalpy aýmaǵy shamamen 25 myń sharshy metrdi quraıdy jáne onyń quramyna kógaldar, jasyl jelekter, aǵashtar men tóseýge jatpaıtyn ashyq topyraq ýchaskeleri kiredi, — delingen habarlamada.
Júrgizilgen ólsheýler nátıjesinde trotýar plıtalaryna naqty qajettilik 9 myń sharshy metrden aspaıtyny anyqtaldy.
Osylaısha, jobada kózdelgen jumys kólemi men materıaldar naqty qajettilikten edáýir asyp ketken, bul bıýdjet qarajatynyń negizsiz jumsalý qaýpin týdyrǵan.
Prokýrorlyq qadaǵalaý aktisi boıynsha memlekettik satyp alý rásimi toqtatylyp, kináli laýazymdy tulǵa jaýapkershilikke tartyldy.
Pavlodar qalasynyń prokýratýrasy zańdylyqty qamtamasyz etý, memlekettik múddelerdi qorǵaý jáne bıýdjet qarajatynyń tıimdi paıdalanylýyn baqylaý baǵytyndaǵy jumystaryn jalǵastyrady.
Aıta keteıik, BQO-da 200-ge jýyq memlekettik qyzmetshi ústeme jumysqa negizsiz tartylǵan.
