Memlekettik satyp alý: otandyq taýar óndirýshilerge 30% mindetti avans beriledi

ASTANA. KAZINFORM — Bıyl 1 qańtarda «Memlekettik satyp alý týraly» zańymen otandyq taýar óndirýshilerdi qoldaýǵa baǵyttalǵan birqatar is-shara qabyldandy. Ol týraly tolyǵyraq Qarjy vıtse-mınıstri Dáýren Keńbeıil aıtyp berdi.

— Birinshiden, ulttyq rejımnen alyp qoıý tizbesin odan ári keńeıtý. Tájirıbe kórsetkendeı, tandyq taýar óndirýshilerdi qoldaýdyń bul tetigi oń nátıje kórsetti. Osyǵan baılanysty, salalyq memlekettik organdarǵa alyp qoıýdy belgileý quralyn belsendi paıdalaný usynylady. Ekinshiden, Qarjy mınıstrligi bekitken tizbe, tártip jáne kólem boıynsha shaǵyn jáne orta kásipkerlik sýbektilerinen taýarlar, jumystar men kórsetiletin qyzmetterdi satyp alý. Bul shara otandyq shaǵyn jáne orta bıznesti qoldaýǵa jáne olardy satyp alý kólemimen qamtamasyz etýge múmkindik berýde. Úshinshiden, bir kózden alý tásilimen ofteık-kelisimsharttar jasasý, — dedi Dáýren Keńbeıil Úkimet otyrysynda.

Vıtse-mınıstrdiń málimdeýinshe, qoldanystaǵy memlekettik satyp alý qaǵıdalary otandyq taýar óndirýshilerdi qoldaýǵa baǵyttalǵan. 

— Taýarlardy, jumystar men qyzmetterdi otandyq taýar óndirýshiler tizilimindegi ónim berýshilerden satyp alýǵa basymdyq berildi. Otandyq taýar óndirýshige 30% mólsherinde mindetti avans beriledi, bul bizdiń otandyq taýar óndirýshilerge sharttyq mindettemelerdi ýaqytyly jáne tıisinshe oryndaýǵa múmkindik berip otyr. Otandyq taýar óndirýshilerdi qosymsha tekseristerden barlyq túrinen bosatý (avansty, shartty jáne dempıngke qarsy sharalardy qamtamasyz etý), bul ónim berýshilerge óz qarajatyn óndiristi odan ári damytýǵa baǵyttaýǵa múmkindik berip otyr, — deıdi ol.

Búgin Úkimet otyrysynda otandyq óndiristi damytý máselesi talqylanyp jatyr.