Memlekettik saraptamaǵa usynylatyn jobalaý qujattamasyn JI tekseredi
ASTANA. KAZINFORM — Endi barlyq jobalar jańa tsıfrlyq sheshimniń kómegimen mindetti túrde aldyn ala tekserýden ótedi, dep habarlaıdy Ónerkásip jáne qurylys mınıstrliginiń baspasóz qyzmeti.
«Memsaraptama» RMK memlekettik saraptamaǵa usynylatyn jobalaý qujattamasynyń tolyqtyǵyn tekserýge arnalǵan jasandy ıntellekt tehnologııalary negizindegi pılottyq modýldi engizdi.
— JI-modýl qujattardyń quramyn, ruqsat berý qujattarynyń ózektiligi men qoldanylý merzimin, olardyń naqty jobaǵa tıesili ekenin, sondaı-aq belgilengen talaptarǵa sáıkestigin tekseredi. Ol úshin kompıýterlik kórý, mátindi optıkalyq taný jáne qujattardyń qurylymy men mazmunyn taldaýǵa múmkindik beretin tildik modelder tehnologııalary qoldanylady. Nátıjesinde qujattardyń tolyqtyǵyn tekserý merzimi bes jumys kúninen eki jumys kúnine deıin qysqardy. Ótinish berýshiler eskertýler týraly aqparatty burynǵydan eki eseden astam jyldam alyp, saraptamanyń kelesi kezeńderine jedel óte bastady, — deıdi mamandar.
Mınıstrlik atap ótkendeı, jasandy ıntellekt aldyn ala taldaý quraly retinde paıdalanylady. Jobany memlekettik saraptamaǵa qabyldaý nemese ony keri qaıtarý týraly túpkilikti sheshimdi «Memsaraptama» RMK mamandary qabyldaıdy.
Aıta keteıik, pılottyq modýl ulttyq sýperkompıýter bazasynda jumys isteıdi jáne QPortal.kz júıesimen ıntegratsııalanǵan. Bul sheshimdi iske asyrý saraptamalyq qyzmettiń tıimdiligin arttyrýǵa jáne qurylys salasyn odan ári tsıfrlandyrýǵa baǵyttalǵan.
Buǵan deıin Úkimet otyrysynda QR Premer-mınıstriniń orynbasary — Jasandy ıntellekt jáne tsıfrlyq damý mınıstri Jaslan Mádıev QazTech, jańartylǵan eGov 3.0 portaly, eGov GPT, eGov Business tárizdi platformalar jóninde maǵlumat berdi.
